Revenue department-ah siamthat ngai a tam – B Lalchhanzova

Revenue department-ah siamthat ngai a tam
– B Lalchhanzova
A department chan Land Revenue & Settlement-ah siamthat leh remfel ngai tam tak a awm tih minister B Lalchhanzova chuan a sawi.
Minister B Lalchhanzova huaihawtin a department enkawl, Food Civil Supply & Consumer Affairs leh Land Revenue & Settlement department-a thawktute chu sawrkar kum kaltaa an department hnathawh a thlirlet pui a, sawrkar kumthara department hmachhawp leh hmabak sawiho pahin department pahnih inkara thawhdunna tha a awm theihnan March 28 tlai khan an inkawmkhawm.
Sawrkar kum kaltaa a enkawl department officer-te leh thawktu dangte tawiawmna a dawn that avangin minister hian lawmthu a sawi a. Land Revenue & Settlement department chu siamthat leh remfel ngai tam tak awm a ni, tiin, department thu chai pawh thu khirh tak tak an ni fo tih a sawi a. Heng hi a tahtawla khawih chhoh zel a nih thu leh kum khat chhungin hna tam tham tak an thawh thu a sawi.
FCS&CA thung chu thu khirh pui pui awm lo mah se, mitin mamawh thil khawihtu department a nih angin thil reng reng chu tih nghal ngai, chinfel nghal ngai hlir a ni thin a, tan mar viau ngai a nih angin a thawhpuite chu theihtawp an chhuah thinnaah lawmthu hrilhin tan mar zel a tul tih a sawi a ni.
A thawhpuite chu kum kalta an thawh thata innghat mai loa, hmalam sawn zel tura fuihin, tun Assembly Session-ah sawiselna aia fakna awka an dawn tam chu anmahni tiphurtu leh nasa zawka mipui rawng an bawlna kawnga chona petu nise a duh tih B Lalchhanzova hian a sawi bawk.