Review Meeting-ah CSR

Nimin khan chief minister Lalduhoma chuan minister F. Rodingliana enkawl department – P&E, C&I leh P&S te hnathawh enpuina ‘review meeting’ a neihpui a. Chief minister hian nikum November thla atang khan review meeting hi a kalpui tan a. A hmasa berah minister Prof. Lalnilawma enkawl – Horticulture, Rural Development leh PHE department te, minister Vanlalhlana enkawl PWD leh, minister Dr. Vanlalthlana enkawl Education department review meeting a lo neihpui tawh bawk a. Heti hian hriat theih chinah minister pali enkawl department te review meeting a neihpui ta a ni.
Review meeting a neihpuinaah chief minister chuan hun vawn dik chungchang a ngai pawimawh hle a. Hei bakah hian mipui hamthatna tur te, system thar te, planning deptt paltlanga project siam te pawh sawi rik a ni thin a, heng zinga sawi rik zin pawl chu CSR chungchang a ni.
Chief minister chuan CSR (Corporate Social Responsibility) hi tunhma chuan a sawi chhuak thiam thiamin an sawi chhuak a, an duh dan danin an hmang zui leh mai niin a ngaih theih, a ti a. CSR hi awmze nei zawka ram tan tangkai taka hman theih a nih avangin CM Office atangin centralise a ni ang a; department tinten CSR in dap zel ang a, CSR Cell hriatpuina zelin in kal tur a ni, a ti.
CSR hi kan hriat angin, company hrang hrang ten hna an thawh hlutna – net worth, turnover leh net profit azirin vantlang hmasawnna hnathawhna atan 2% an thawh (donate) ve thin tur a ni, tih dan, Companies Act, 2013 (Section 135) hnuaiah a awm a. Mizoram chhunga road, railways, building construction etc. rawn thawkte atanga CSR hmuh theihte hi a thahnem tham ve viau ang tih a rinawm a. Heng CSR te hi engemaw zat chu a nihna tur anga hman tangkai lohvin a riral ve thin tih chief minister thusawi atang hian a lang a. Dik taka CSR kan hmuh ang angte hi Mizoram hian hmasawnna hna thawhna atan hmang thei ila, hma kan sawnpui ngei ang tih a rinawm.
CSR hi CM Office atanga centralise tur a nih chuan, Chief Minister Relief Fund pawh a luhkhawm dan mipui hmaa tlangzarh thin a ni ang hian, CMO hian CSR luhkhawm dan hi langtlang takin mipui hmaah puangzar ve thei se a tha khawp ang.