ISUA NIHNA DANG PALI

Rev Dr Ramengliana

-- Advertisement --

Kar kalta khan Isua nihna pathum ka rawn chhawp chhuak tawh a. Khangte kha ama kamchhuak atanga kan hriat an ni a. Vawiinah pawh hian ama insawina ngei atanga a nihna pali dang han hre tlang leh ila a tha awm e. Midangin a nihna leh ropuina an hmuh thiam dan an sawi hi chu a tam a. Aman ama nihna a sawi hi a ngaihnawm dan a dang a, a chian pawh a chiang deuh turah ka ngai a ni. Tin, amah ngeiin a sawi hi chu kan ngaithla liam mai mai tur ni lo lehzualin a hriat bawk a.
1. Alfa leh Omega ( Thupuan 22:13)
Lal Isuan,“Kei hi Alfa leh Omega, hmasa ber leh hnuhnûng ber, a bul leh a tâwp chu ka ni.” (Thupuan 22:13) a tih khan a thu chai a lian rep rep hle a. Ringtute hnenah amah ringzoa, amah innghat ngam tura a hrilhna leh a nihna dik tak a puan chhuahna a ni. Krista dotu (Anti-Christ) thil ti thei tak tak leh Sakawlh te pawh rawn chhuak mahse a tawpa hnehtu a nihzia a sawina a ni.
Greek hawrawpah chu Alfa-in a intan a, Omega-in a tawp bawk a. Isuan a sawi hi “Kei hi A leh Z ka ni,” a tihna mai a ni a. A atanga Z pawn lamah eng hawrawp mah a awm tawh lo! A awmzia erawh chu, “ ‘Engkima Engkim,’ ka ni e. Hlau suh u. Lei leh van hi ka thu thua inher vel a ni,” a tihna a ni awm e.
“‘Alpha leh Omega’ ka ni e,” a tih hian ‘Pathian ka ni,’ a tihna a ni bawk a. A hmasa ber leh a hnuhnung ber, a bul leh a tawp nihna chu Pathian chan a ni a, Isua Krista hian a sawi tim lo hle a nih hi. Tunlai khawvelah mi tam takin Isua Pathianna an rinhlelh mek lai hian heng thu hriat hi a nuam thin a ni. Khawvel sakhua zingah Islam hian Isua Pathianna a hnawl chiang hle a. Kristianna hnaih deuh roh Jehovah Witness leh Mormons ho hian Pathian famkim a nihna an pawm ve lo bawk a. Keini erawh chuan Alfa leh Omega a nihna kan pawm thung a ni.
2. Khawvel eng (Johana 8:12)
Thima awmte mamawh ber chu eng a ni a. Eng hnuaiah lo chuan thil tih theih a awm meuh lo. Kan pi puten an thuk eng chauh an rin lai phei kha chuan eng hlutzia a chiang zual awm e. Tunlaiah pawh thingtlang electric neih mumal lohnaah chuan arkaiden zan te hi a hluin a nuam zual em em a ni.
Eng chuan kawng dik min hmuh tir a, thil hlauhawm min hriattir thin. Thil mawi min hmuhtirin thil tha a lan fiahtir bawk. Hringnun hlimna zawng zawng hi eng tel lo chuan awm thei lo tluk a ni awm e. Zan thima awmte nghahhlelh ber chu zing khawvar a la ni reng a nih hi.
Isuan, “Kei khawvel eng ka ni,” a tih hian mihringte mamawh bul ber a nihzia a puang chhuak chiang a. ‘Khawvel mamawh’, ‘Khawvel tinuamtu’, ‘Khawvel hmasawnna thlentu,’ ‘Khawvel tan malsawmna,’ a ni tih a puang a ni. “Kei khawvêl êng ka ni. Tu pawh mi zui chu thimah an lêng tawp lo vang a, nunna êng an nei zâwk ang,” (Johana 8:12) a ti ngat a nih kha.
Lal Isua chauh hi khawvel tana eng nih tling a nih avangin amah chauh hi zui manhla awmchhun a lo ni a. He thu hi mimal nun leh thih hnu khawvel chungchang chauh ni lovin, Krista Chanchin Thain khawvel a siam that nasatzia hi tunlai mithiam ber berten an hai hleithei tawh lo a ni.
3. Mi bawrhsawmte daktor (Marka 1:17)
Lal Isua danglamna mak tak chu khawtlanga mi suala an ngaih, mi bawrhbang, mi hmingchhiate nena inpawl leh an zinga khawsak a hreh ngai miah lo kha a ni. Thuthlung Thar zir chik mite pawhina a danglamna an sawi thin chu khawtlang thinhrik mite nena dawhkan khata chaw a kil mai thin kha a ni. Hei hi khawvel rilruin a pawm thiam vak loh thil a ni.
A chhan nia rin theih chu mi zawng zawngin an sualna an hriat tawh te hi chuan an nihna an pawm tawh a, thup si se an tum tawh lo. Inngaitlawmin Isua hnenah hmai fai tak lantir tumna an nei tawh ngai lo a ni. Chhungrila takna nei si lova pawn lam lan dan chauh duhtui ho leh sakhua mahni inhaivur nana hmang ho chu beih a, an sualna hriattir a ngai thin niin kan Lalpa hian a hria ni ngei tur a ni.
He thu a sawi lai pawh hian chhiahkhawntu pakhat Levi an tih inah chaw a ei kha a nia. Pharisai hovin an ngai thei lo hle a nih kha. Rom sorkar sum tura Juda mite hnena chhiah khawn ngatte hi an ngaithei lo. Hnam hmelma angah an ngai hial a ni. Amaherawhchu, Lal Isuan, “Mi bawrhsawmten Doctor an mamawh zawk ang hian min mamawhtute chu, mahni thatnaa lungawi ho aiin, mi sual ber ber te hi an ni zawk alawm. Sual vanga na tuartuten damna an neih leh theih nana lo kal ka ni e,” tiin a rawngbawlna awmze dik tak chu chiang takin a sawi mai a ni.
4. Vengtu tha (Johana 10:11)
Thu sawi thiam chuan mi mawl ber pawhin an hriatthiam theih turin an sawi thiam thin. Lal Isua hi chutiang mi chu a ni tih a chiang khawp mai. A hrilhten awlsam taka an lo man zung zung theih turin thlarau lam thuchah pawimawh tak tak a hrilh thin a ni. Chu chu, “Kei beram vengtu tha ka ni,” (Johana 10:11) ah pawh hian a lo lang a.
Beram vengtu chungchang pawh hi chutiang chiah chu a ni a. Kan ramah beram vulh kan chin loh avangin berampu nihna leh a kaihhnawih kan zu hre mai thei lo. Isua lenna ramah thung kha chuan mi tam tak eizawnna a nih miau avangin Isua thu sawi ngaithlatute kha chu an chiang ngawt ang. A te ber atanga a lian ber, a mawl ber atanga a fing berin beram vengtu tha leh tha lo awm dan chu an hre thiam nghal dawn a ni.
Beram vengtu tha anga a insawi hian Lal Isuan a beramte tana a inpekna leh an tana a inhuam chin pawh a lang nghal a. Beram hi ran inthazo lo, mahni inveng zo lo, leh ran fing em em lo tak a ni a. Seh tumtute laka inven theihna a nei tha lem lo hle. A beitu ramsa koham tak tak lakah beram vengtu chu a huaisen a, a chak a, inpekna tak tak nena a venhim a ngai thin. Chutiang mi chu amah ringtute tan Lal Isua hi a ni a. Ama nun hlan khawpin a mite tan a inpe a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More