RFA humhim turin sawrkar ngen Bawlhhlawhah dan kenkawh duh

Environmental NGO-te chuan reserved forest leh protected area ho humhalh tha turin sawrkar a ngen a. Bawlhhlawh paih leh sawngbawl kawngah dan awmsa khauh taka kengkawh turin thuneitute an ngen bawk.
Mizorama environment venhim leh humhalh kawnga thawk thin pawl panga – Centre for Environment Protection, Association for Environmental Preservation, Green Mizoram Network, Save Environment Association leh Clean and Green Revolution chuan chief minister hnenah ngenna an thehlut a. Ram leh hnamin hma hun tha a neih theihna atan sawrkarin a tih hlawhtlin ngei an beisei tih sawiin, environment tha tak nei chunga ramin hmasawnna tlo a neih theihna’n theihtawp chhuahpui an inhuam tih an hrilh.
Reserved forest, protected area (RFA) adt. nek nasat nia a lan thu leh an hriat danin, square km. 107.37 a zau nek (encroached) a ni tih an sawi a. RFA chhung hmun tam takah khua, in ding, huan hmun nghet – WRC, thei huan adt. a tam hle, tiin, heng hi survey chian a, dan anga hnawhchhuah (evict) emaw ram pass cancel ngai leh dan hmanga dahngheh theih chi thliara chinfel thuai an duh tih an sawi.
Notified forest leh deemed forest atana comprehensive record buatsaih tura kumin February 14-a din Joint Verification Team-in hemi chinfel hna hi hma tel se an duh tih thlenin, ‘Chinfel thuai a nih loh chuan, ram chungchangah buaina a awm chho reng dawn a. Chinfel a nih chuan RFA chhunga ram pass pek palh pawh a awm tawh dawn lo a ni,’ an ti.
Bawlhhlawh enkawl leh sawngbawlah dan hman mek kenkawh kawngah nasa zawka mipui hriat tul hrilhhriat a, dan kengkawhtute pawhin danin tih tur a tih anga tih kawngah chak zawkin hma la se an duh tih an thlen a. Aizawl bikah AMC Solid Waste Management Bye-Laws 2019 leh AMC Plastic Waste Management Bye-Laws 2019 chu khauh zawkin AMC-in kengkawh se, Aizawl pawnlamah chuan dan awmsa – Solid Waste Management Rules 2016 leh Plastic Waste Management Rules 2016 chu khauh taka kengkawh turn sawrkarin hma la se an duh tih an sawi a ni.
Mizorama ramhmul ho chu awmze nei zawka humhalh leh chhawr tangkai a nih theihna’n National Working Plan Code 2023 behchhanin territorial forest division zawng zawng tan working plan/ scheme siam thuai an duh tih an thlen a. CAMPA fund hmang turin PES scheme ang chi kalpui tha an tih an sawi.
‘Khawtin deuhthaw in ramngaw humhalh tha tak tak an nei a. Heng hi awmze nei zawka humhalh leh hman tangkai a nih theih nan terms of reference nen scientific management of forest kalpui nise, Forest department-in technical inputs lam tumin, khawtlang theuhin a enkawl hna tum se, mipui nena thawhhona huang zau zawkin hawn a ni anga, hei hi Forest department hmalakna chhuanawm tak a ni thei dawn a ni. Tunah hi chuan a hming deuh chauha kalpui a nih avangin awmzia a nei thui rih lo hle,’ an ti bawk.
Ram leilung pianken hausakna kan neihte mumal zawka kan chhawr tangkai theihna atan Mizoram State Forest Development Corporation neih ve ngei an duh tih chief minister hnenah hian an thlen a. The Mizoram (Forest) Act 1955 siamthat tum chu chak zawka kalpui an duh thu leh Mizoram (Forest) Rules pawh tha taka duan nghal tha an tih thu sawiin, ‘Kan rama ram leilung pianken hausakna (natural resources) enkawlna dan siam dawnin a duangtu turte Mizo hnam tih dan phung leh hnam dan hre tak ni ngei se, chumi mila dan duan hi awmze neia ram leilung pianken hausakna enkawl kawngah a pawimawh,’ an ti.