India leh Bangladesh inrina hung a nih laia mimal ram laksak vanga zangnadawmna dawngtu zingah ram pass lem siam an awm tih hriatchhuah a ni a, he thila inhnamhnawih mi 23 chu court-in thiam loh a chantir.
Prevention of Corruption Act Court special judge Dr HTC Lalrinchhana atanga thu dawn danin, kum 2007 vel khan India leh Bangladesh ramri hung hna thawhna tura sawrkarin mimal ram a laksakah ram pass (LCS) lem 35 hmangin zangnadawmna Rs. 5,03,96, 680 an dawng nia hriat a nih vangin Central Bureau of Investigation (CBI) chhui tir a ni.
He thubuaiah hian khatihlaia Chakma Autonomous District Council-a revenue officer (Settlement) Ranga Mohan Chakma chu ram pass lem pechhuaktu bera puh a ni a, CADC hnuaia surveyor pahnih – Borcheg Image Chakma leh Manabendra Chakma te nen inthurualin ram lak ngai tur hming (list) dik lo taka inthuruala siama puh an ni. Ram pass pek chhuah ni hi a vai deuhthaw hian sawrkar pisa chawlh ni a ni tih tarlan a ni a. Ram pass-ah hian CADC (Agricultural Land) Act 1983 leh CADC (Agricultural Land) Act 1993 hnuaia pek anga tarlan a nih laiin, he dan hi a awm loa, CADC (Agricultural Land) Act 1982 chauh hi dan an neih a ni.
Kum 2009 vel khan dan dik loa thiltiha tel mi 21 hian zangnadawmna hi an dawng a. A dawngtu zingah hian khatihlaia CADC chairman Sushil Kumar Chakma (Rs. 4,54,000) leh a fanu Tamanna Chakma (Rs. 5,18,000), revenue officer fanu Rakhi Chakma (Rs. 4,47,000), surveyor Borcheg Image Chakma (Rs. 2,57,750) te bakah hetihlaia Lawngtlai district bawrhsap Zahminga nupui Thanmawii chuan midang hmingin Rs. 9,25,500 a dawng tih hriat a ni a, a ni hian mihring tak tak awm lo Jarman Chakma leh Kumbir Chakma te hmingin a dawng nia hriat niin, CBI-in thubuai an chhui lai hian Rs. 9,25,500 hi an mansak nghe nghe.
Zangnadawmna dawngtu mi 21 bakah hian a hunlaia CADC revenue officer leh surveyor pahnih pawh hi thubuaiah hian telh an ni a. Hetihlaia Lawngtlai bawrhsap pisa-a UDC David C Darduna chu he thubuaia zangnadawmna pechhuaktu ber, ram pass dik lo a ni tih hrereng chung leh, a bikin bawrhsap nupui zangnadawmna dawn turah phei chuan midang hming ni si, ‘T. Mawii’ tih hminga pawisa pechhuaktu a nih angin thubuaiah hian telh a ni bawk.
Thubuai kalpui a nih lai hian ram pass lem hmanga zangnadawmna dawngtu zing ami Jamallya Tongchangya leh hetihlaia district bawrhsap Zahminga te hi an thi a, an chungchang thu ah court hian thutlukna a siam thei lo thung.
CBI-in an chhuinaah hian finfiahna an nei tawk tawha hria in, zangnadawmna dawn duh vanga thuneitute bum, lehkha lem leh diklo a tak anga thuneitute hnena hman, sawrkar hnathawk an thuneihna anmahni emaw mi tute emaw tana hman khawloh leh chutianga inthuruala dan bawhchhiaa puhna thua dan bawhchhiaa an ngaih mi 23 chu court hian an chungchang thu a ngaihtuahnaah thiam loh a chantir. Thiam loh chantir zing ami – Patul Chakma leh Tamanna Chakma chu tun thlenga la man loh an ni a, a bak mi 21 man tawhte pawh bail-a chhuah lailawk an nihna chu sut sak niin, 2024 May 17 hian jail-a khung leh nghal turin court hian a ti.
La man lohte chungthu pawh hi hrem an nih dan tur ngaihtuah huna la rel tel tur niin, he thubuai kaihhnawiha CBI-in an man Rs. 9,25,500 chu sawrkar sumbawma chhunluh nghal turin a ti a ni.
CBI chhuinaah leh court-a finfiah tak zingah hian, ram pass lem hi chutihlaia CADC chief executive member Kali Kumar Tongchangya leh executive members – Dr Buddha Dhan Chakma, Tarani Sen Chakma, Buddha Lila Chakma leh Mohan Chakma te chuan, 2009 July 21 khan document hi tih chhiat vek turin an rel a, July 23-ah thupek hi tichhuak zuiin, hemi ang hian ram pass lem awmna file hi CADC hian an lo tichhia /ral vek a. Hei hian an ram pass hi a lem a nih zia tichiangtu ah a ngai tih court hian a sawi. Chutih rualin, he thutlukna siamtu CADC hotute hi CBI hian thubuai an siamsak ve loh avangin an chungchang hi court hian a ngaihtuah tel lo tih a sawi.
Ramri hungna ram laka pass lem siamtu mi 23-in thiam loh chang
Get real time updates directly on you device, subscribe now.
Next Post