Rilru hah laia a damdawi chu thu leh hla

I rilru a hahin eng nge i tih thina engtin nge i hmachhawn thin? Lalremsiama Darchhun chuan rilru hah damdawi atan thu leh hla a hmang a, thu leh hla a ziak thin asin.
Tun hnaiah MPSC buatsaih Mizoram Civil Services (Combined Competitive) Examination result a chhuak a, Mizoram sorkar hnuaia exam sang bera ngaiha pakhatna chu Lalremsiama Darchhun a ni. Poetry a phuah thin a, thu (prose) pawh a ziak thin, a rilru hah laiin.
“Literature hi mi tui anga tui chu ka ni lo mai thei a, kei chuan rilru hah chang te hian ka ziak thin a,” a ti a, chu chu a hlawkpui thu a sawi.
Mi dangte ang bawkin rilru hah chang a nei a, exam dawna ipik chang te, fail hlauh chang te pawh a nei ang. Chhan hrang hrang vanga rilru hah thei ve bawk a ni. Chutianga a rilru a hah chang chuan damdawi atana thu leh hla a hmang thin.
“Ka rilru a hah changa ka ziahah hian a tam ber chu poetry a ni a, prose pawh a awm ve tho. Ka rilru hahna kha ka ziak thin a, ka hlawkpui, ka thawl hawk thin,” a ti. “Min tihahdam a, rilru hah chang chuan hetiang hi ka hlawkpui ber,” a ti bawk.
Pawl 10 a nih lai vel atangin hetiang hi a ti thin tih a sawi a, a rilru hah laia a inbun ruahna thu leh hla hi a dahthat zel thu sawiin, a hnua a chhiar leh pawhin a la hlawkpui thin tih a sawi.
“A hnuah pawh ka chhiar nawn thin a, ka la hlawkpui tho,” a ti a, “Keimah hrim hrim hi, tawngkaa thil sawi aia ziaka sawi nuam ti zawk ka ni a, ka tan chuan hetianga ziah hi a hlu,” a ti. Mi tih ve atan pawh a awt a, “Mi pawh hian ti ve se an hlawkpui ve tho ang,” a ti bawk.
Lalremsiama Darchhun hian a zirnaah social media-in a tihbuai loh thu a sawi a, instagram leh facebook account a nei ve a, mahse a nuam ti chi a ni lem lo a ni ang, a khawih vak lo, a hmingin account a nei ve a ni deuh mai. Whatsapp erawh a khawih a, mi dang nena inbiakna hmanraw pawimawhah a neih. Mahse, whatsapp-in a tibuai dawna a hriat chuan a uninstall mai thin.
Hetia whatsapp a uninstall chang hian a tir lama hrehawm han tih chang a nei a, “A tirah hi chuan hrehawm han tih chang ka nei a, mahse han tilui ila, a reh mai,” a ti.
Internet hmangin a zir nasa a, “Internet hi ka hmang a, chhiar tur dap nan ka hmang a, ka tangkaipui khawp mai,” a ti.
Synod Resource Centre-ah nilengin a inkhung a, tlaiah hawin, zanah a zir zawm leh thin. Dar 11 a thleng tlangpui a, dar 12 thlen chang pawh a ngah. Zan lamah hi chuan news leh current affairs vel a bih tlangpui.
Competitive exam tura inbuatsaih hi hautak tih chang a nei a, hahthlak te pawh a ti ve thin. “Hahthlak tih chang ka nei a, ka hah deuh hi chuan ka chawl zuai a, tichuan ka chhunzawm leh thin,” a ti.