Rilru lama dam lo mi 2853-in helpline bepawp

National Health Mission hnuaia hmalakna pakhat, rilru lam harsatna neite tan TeleMANAS helpline 14416 bepawpa an puihna diltu chu kumin July 31 thleng khan Mizoramah mi 2853 an awm tawh.
Mizorama NHM managing director Dr Eric Zomawia sawi danin, TeleMANAS helpline no. 14416 hi engtik lai pawhin biakrawn theih an ni a. Rilru leh a kaihhnawih lama harsatna tawkte pawhin tanpuina zawn kawngah kan bengvar sawt nia a hriat thu sawiin, “Hetiang lam harsatna neiten inzep mai loa, mithiamte biakrawn nachang an hriat a pawimawh hle a ni,” a ti.
National Mental Health Programme (NMHP), National Programme for Health Care of Elderly (NPHCE), National Health Mission (NHM), Mizoram Health & Family Welfare department leh Alzheimer’s and Related Disorders Society of India (ARDSI) Mizoram Chapter tangho chuan Ningani khan Aizawlah kum upate pualin a thlawna inentirna an buatsaih a, mi 100 an inentir.
Free clinic hawnna hmanpuitu Dr Eric Zomawia chuan “hrisel tak leh harhvang taka damrei” tih thupuia hmangin district tina Health and Wellness Centre a awm thu leh heng hmunah hian mithiam rawn theih reng an nih thu a sawi.
ARDSI Mizoram Chapter president Vanneihtluanga chuan upate tana mahni induat thiam a, inpawm thiam a pawimawh tih a sawi a. Kum upatna in a ken tel harsatna chi hrang hrang tawkte tan ARDSI helpline-ah tanpuina dil theih reng a ni tih a sawi bawk.