Rilru lama harsatna tawkte enkawl dan tur zirho dawn

School of Medical and Paramedical Sciences Mizoram University chuan anmahni hmunah ni thum awh international conference – “Emerging Trends in Psychological Interventions (Health and Allied Sciences): Future Prospects and Challenges” a buatsaih.
Thawhlehnia a hawnna hmanpuitu larsap Dr Hari Babu Kambhampati chuan, tunlai khawvel hmasawnna sang zelah sum leh pai, ei leh bar bakah mahni bil hmasawnna atana kan intlansiak nasat avangin rilru lamah nasa taking mihring hriselna a tlahniam mek a. Rilru lama harsatna tawh vangin mi tam tak an buai a, mi tam takin nunna an chan mek tih a sawi.
“Rilru lama mithiamte hnathawh tur leh chona tam tak kan khawtlang nunah hian a awm a. Psychology lam mithiamte leh zirlaiten mawhphurhna leh chona lian tak kan hmachhawn a ni,” a ti. Rilru lama hriselna chungchanga zirhona, khawvel huapa mithiam rual intawhkhawmna ni pahfawm, Mizoram University-in a thleng chu tha a tih thu leh hun an hman turte hlawl taka hmangho turin duhsakna a hlan tih a sawi a ni.
Hun hmanpuitu dang Gauhati High Court judge Justice Nelson Sailo chuan dan leh hrai kaihhnawih lam atangin rilru lama harsatna tawkte dinhmun a sawi a. Rilru lam harsatna avanga nunna chan tam tak an awm thu leh tanpuina pek dan tur sawiin, psychology lam mithiamte mawhphurhna leh society anga mawhphurhnate a sawi. Conference-a tel zinga Mizo zirlaite chu an thiamna a mamawhtu mipui tam tak tan an pek theih dan ngaihtuahna seng turin a fuih a ni.
Khawvel ram hrang hrang atangin leh India rama institute tha atangin thusawi tura mi engemawzat sawm an ni a. An ni bakah hian researcher-ten an thil hmuhchhuah an sawi dawn a. Conference atang hian rilru harsatna enkawl dan thar leh tha zawk hmuh chhuah a nih a, taksa damna thlen thei khawp zirchhuah a nih beisei a ni.