Rin phak bakin tuilianin harsatna min thlen dawn – PHE minister

Cyclone Remal vanga ruahsur nasa in Tlawng lui a tih len chuan an rin phak bak aia nasa in Aizawl tana tui laknaah harsatna a thlen tih PHE minister Prof. Lalnilawma chuan a sawi.
PHE minister sawi danin, tunhnaia ruahsur nasa vanga tui lian khan Aizawl khawpui chawmtu tui lakna, Greater Aizawl Water Supply Scheme Phase I khawl thenkhat chu tuiin a chim a, Thawhlehni chawhnu khan harsatna an tawh dan hi enfiahin a hmunah a tlawh nghal a. An rin phak bakin tuilian hian hasratna a thlen tih a sawi.
Tui a kam deuh hnuah pawh chirh leh bawlhhlawhin a tihbuai nasat avangin a thenfai chhung ringawt pawh a rei dawn a, mumal taka tui an sem leh theih nan thla tel hun an mamawh maithei tih a sawi. “Tui pump-na khawl hrang hrang hi a chhiat leh chhiat loh enfiah a ngai dawn a, khawl hi a chhia a nih phei chuan sum tam tak senga siamthat a ngaih dawn avangin Thawhlehni zan khan chief minister hnenah thil awm dan ka thlen nghal a. Sum pawh kan mamawh nual maithei tih ka hrilh,” a ti.
PHE hotute chuan mipui hnenah tui an sem thei rih dawn loh avangin, tui renchem tur leh ruahtui khawl nachang hre turin mipui an chah a ni.
Tuilianin tui lakna a nghawng dan:
# GAWSS Phase I Pump House a chim vek a. Raw Water Pump House mai ni loin, a thlitfimna – Clear Water Pump House thlengin a chim a, eng angin nge khawl a tihbuai dawn hriat a ni loa, khawl ro hnuah thil awmdan an hriatchian theih chauh dawn.
# Tuilian hian GAWSS Phase II chu chim ve lo mah se, kawlphetha pekna line a chhiat avangin tui pump theih a ni chuang lo a; Phase II bika hman tur hi diesel generator set thar an neih sa hmanga tui pump dan ngaihtuah mek niin, nizan atang khan pump tan theih an tum. Lo hlawhtling ta pawh nise, ni khata tui litre maktaduai 8 vel chauh pump theih a ni.
# Ni khata tui litre mtd. 37 pump theihna tura ruahman, GAWSS Phase III pawh tuilian hian a chim avangin tui pump theih a ni rih lo.
# Tuilianin khawl a tihbuai bakah tui a nu nasa a, tui nut zawng tehna NTU 5 chu mihring in tlaka ngaih a nih laiin, May 28 tuilen laia a nut zawng chu NTU 900 chunglam a ni a, thlitfim tum pawh buaipui tham a tling.
# Saitual khawpui chawmtu Tuivawl tui laknaah kum tin tuilian vangin harsatna a thleng a, tun tum tuilianah transformer a chim a, a ro phawt loh chuan tui pump theih a ni lo.
# Lawngtlai tui lakna sub-mersible pump hmanga tih pawh tuilianin a lak thin avangin senghawi rih a ni a, tui an pump thei lo.
# Hnahthial tui lakna chu fimkhur thilah khawl senghawi a ni a. Serchhip tui pump-na pawh kawlphetha pekna a chhiat avangin pump theih a ni rih lo.