Rinkai Hunthar an chungnung

CYMA leh Mizoram Volleyball Association (MVA) te buatsaih LBS Suzuki Avenis, 24th Inter Branch YMA Volleyball Tournament 2026 chu August ni 7, Zirtawpni khan R Dengthuama Hall-ah khelh chhunzawm a ni, mipa lamah champion tura rinkai Hunthar chu Tualcheng lakah chungnung takin an inlan a, set thum la zawnin last 16 an lut. Zirtawpni a inkhel dangah Maubawk leh Electric Veng ten hnehna an changin last 16 an lut ve bawk.
YMA Volleyball a hnuhma nei tha ber Hunthar hi Pool D-ah seeded an nih vangin an bye a, second round ah Armed South lakah chungnung taka inlan Tualcheng an hmachhawn. Tualcheng lakah chungnung takin an inlan ve thung a, Volleyball-a an sanzia chiang zawkin an lantir nawn leh a, awlsam takin set thum an la zawn vek a, chelh rual an ni lo.
Champion tura rinkai ber zinga mi Hunthar hian Tualcheng lakah tha chungchuang takin bul an tan a, set khatnaah an khingpuiten point 4 bak an hmu thei lo. Set hnihna tir lamah hnufual zawk ni bawk mah se zam eih lovin an inlan a, harsatna lian tawk lovin set an la zui leh. Set thumnaah pawh an chungnung zui leh viau a, Tualcheng lakah hian 25-4, 25-21, 25-11 ngawtin an chak zui ta a ni.
Zirtawpni a inkhel dangah YMA Volleyball ah vawi thum ngawt champion tawh Maubawk in Bawktlang an hmachhawn a, set hloh lova chakin last 16 an lut.
Volleyball thiam veng Maubawk hian zaithiam lar Lalsangliana (Taite-a) telna Bawjtlang YMA team an dim lo hle. An khingpuite hian set khatnaah point 10 chauh an hmu. Bul an tan that em vangin an phur a, inrintawkna sang zawk nen an inlan chhunzawm. Set hnihnaah an khingpuiten point 13 aia tam an hmu thei lo leh a, set thumnaah khelh tha hretin point 20 hmu tling bawk mah se Maubawk lakah hnehna chang tur khawpin an thochhuak zo tawh lo. Maubawk hian Bawktlang lakah 25-10, 25-13 leh 25-20 in hnehna an chang zui ta a ni.
Zirtawpni a inkhel ngaihven hlawh dangah hmunhma nei tha leh Pro Volleyball League-a club nei hial Electriv Veng leh In 70 vel lek ni chunga ‘Volleyball thiam khua ti a’ sawi theih Pamchung te inkhel a tel. An inkhel hi en chakawm viau mah se 3. Electric Veng Br in awlsam takin hnehna an chang a, last 16 an lut.
Electric Veng hian Pamchung lakah beisei phak baka thain bul an tan a, set khatnaah an khingpuite hian point 10 bak an hmu thei lo. An khaw thenawm Tualcheng an tlawm laia chak tum tak Pamchung hian thawhchhuah ngei an tum viau a, set hnihnaah beiseiawm takin an inlan. Set hnihnaah hian khel tha hret mah se point 20 aia tam an hmu thei chuang lova, set an hloh nawn leh. Set hnih la zawn tawh Electric Veng hi inthlahdah hauh lovin an inlan a, awlsam pangngai taka set la zui lehin Pamchung lakah hian 25-10, 25-20, 25-13 in an chak zui ta a ni.
Zirtawpni a inkhel dangah Tachhip leh Hmuifang ten inkhel inkhel hmuhnawm an lantir a, set li an khelh chhungin point ah inthlau lo viau thin mah se Tachhip Br. in 3-1; 30-28, 24-26, 25-19, 25-23 a hnehna changin a thiam zual 16 zingah an inhlangkai.
Mipa lama inkhel dangah Bungtlang Chhim Veng Br., Sihphir Br., Dengsur Br leh Nursery Veng Br ten hnehna changin last 16 an hlut hlawm bawk.
Zirtawpni khan last 32 khelh zawh a ni a, vawiinah inelna neih chhunzawm a ni ang a, last 16 khelh zawh niin quarter-final lut a hriat kim theih dawn.
Mipa lamah last 16 khelh tan a nih lai hian hmeichhe lamah erawh chuan quarter-final khelh zawh a ni dawn thung. Zritawpni a hmeichhe lamah inkhelah Dinthar Br chuan an khingpui Armed Veng South Br chu (3-0)
25-10, 25-19, 25-14 in an hneh a, quarter-final an lut. Dinthar hian quarter-final-ah Lawipu Br an hmachhawn zui leh dawn a. Inkhel dangah Luangmual in Tuirial an hneh ve bawk.