Rinnunga rin a nung

Kg 162-a rit a chawi a, kg 158 chawi zo lova a thlauh hnua chawi a ni. Chu mai a ni lo, hliam na tak tuar hnu a ni a, chuti chunga kg 162 chawi han tum kha, tan a na ngawt ang, a zam pawh a zam ve ang. “Lalpa, Lalpa, Lalpa…” tia a Pathian ko chungin a chawi a, a chawi zo ta hlauh mai! Bronze medal a la.
Weighlifter tha, Commonwealth Games leh World Youth Championship tea gold medalist Jeremy Lalrinnunga’n kum hnih dawn liam taah khan hliam na tak a tuar a, Mumbai-ah a dar an zai bawk. Kum khat leh a chanve vel a chawlh hnuah Senior National Championship-ah medal a la leh ta.
February ni 5-14 chhung khan UP state-a Modinagar-ah Senior National Weightlifting Championship an khel a, kum khat leh a chanve vel a chawlh hnua inelnaa a tel leh vawi khat nan Rinnunga pawh a tel – kg 65 category-ah bronze medal a la.
A lawm em em mai a, rit a chawi lai thlalak leh Isuan kraws a pu lai lem (video) te dah dunin facebook-ah a post. “Isuan ka tan engkim a ti vek. Lalpa nen chuan engkim a theih. Chu chu ka rilrua awm a ni,” tiin hemi chungchang hi a sawi.
A taksa hmun hrang hrangah hliam a tuar a, a nghawng leh a kawng a nat avangin hun engemaw chen harsatna a lo tawk tawh. 2022-a Commonwealth Games-a a tel pawh khan, doctor-in tel lo turin a ti a, chutiang hliam tuar chung chuan a tel a ni. A dar zai a ngai leh ta zel a, ritchawiah chuan dar zai hi thil pawi em em mai niin, khawvel huap pawhin dar zai hnua inkhel leh thei an tam lo, mi vannei tawpah ngaih an ni.
A dar an zai hnuah a chawl ta vang vang a, a inkhel thei tawh lo ang tih hlauvin rilru hrehawm takin hun a hmang thin. Tih theih a nei chuang lo a, a dam hun a nghak tawp mai a ni.
“Ka chunga thleng tura ka ngaih ngai loh kha ka chungah a thleng a, hrehawm ka ti khawp mai. Ka tum a lo sang ve si a, inkhel thei tawh lo tura han inngaih chu hrehawm tak a ni,” a ti.
A zia deuh deuh a, nikum July velah khan a training ve leh thei ta; mahse a hautak hle, khawvel huap pawha tleirawl weightlifter beiseiawm pawl ni thin khan kg 20 pawh a chawi zo ta lo!
“Kg 20 pawh ka chawi zo lo. Ka dar vei lam (an zai lam) hian a zo lo a, ka dar vei lam hian technique leh movement kha a ti thei lo hrim hrim,” tiin chung laia a dinhmun a sawi.
“Hetiang a nih chuan ka inkhel thei tawh dawn lo a nih hi ka ti a, thiante pawhin min khawngaih a. Anni an fit em em laia kg 20 pawh chawi zo lova kil khata ka lo awm ve kha thiante pawhin min khawngaih a. Chung lai chuan ka depress nasa a, ka thiante tan khan hriat loh theih pawh a ni lo,” tiin a sawi zawm a ni.
“Mahse ka ti bek bek a, ka training ve zel a,” a ti a, “Ka tawngtai a, tawngtaina nen ka bei a. |awngtaina hian thil a tithei a ni tawp mai. Ka sawi thiam lo, sawi thiam hi chak thin, tawngtaina hi a ropui a ni,” a ti.
A pain a fuih thin thu leh chu chu a hlawkpui thu a sawi bawk. A pa hi boxer thin, Mizoram tana medal pawh lo hnek chhuak tawh thin Lalneihtluanga a ni a, ani hian a thil lo tawn tawhte atangin sawi tur leh sawi awm tak te a hria, Rinnunga hian a hlawkpui thu a sawi.
Senior National Championship-ah a tel ta a, hliam na tak tuara kum khat leh a chanve hnua inelnaa a tel chu a zam ve, a zep lo!
“Ka hlau, ti tawp mai ang, chetsual palh kha ka hlau a. Dar zai tawh hnua inkhel leh thei an tam lo tih te ka ngaihtuah a, ka nervous ve,” tiin a dinhmun a sawi.
Theihtawp a chhuah a, mahse ngai a la awh thei lo. Kg 158 a chawi zo lo a, chuti chung chuan kg 162 chawi a cho!
“Lalpa nen chuan theih loh a lo awm lo a ni! ‘Lalpa, Lalpa, Lalpa…’ ka ti char char a, a mak lutuk, ka chawi zo ta mai!” tiin mak tak maia kg 162 a chawi zawh tak thu a sawi.
“Ka’n char mai chu ka lawm lutuk a, ‘Lalpa, ka lawm e,’ ka ti nghal. ‘Haleluiah’ ka ti a, ka paih thlak lai pawhin lawmthu ka la sawi mawlh mawlh. A char tak hi ka harsatna a ni a, mahse kg 158 ka thlauh hnuah a aia rit ka char thei tlat si!” a ti bawk.
Tun hmain social media influencer pakhatin video dang leh Isuan kraws a pu lai lem a dah dunna a hmu a, a rilru a hneh em avanga a download thu leh a dahthat thu te sawiin, a dar an zai hnuah chu chu a en leh a, a rilru a hneh thu leh chakna petu a nih thu te sawiin, Senior National Championship-a medal a lak pawhin a hrechhuak a, video clip a siam ve ta tih a sawi.
“Ka dam loh lai khan rilru a hah duh khawp mai a. Chawlh mai ka rilruk fo a, ‘Inkhelh hi chawlhsan ila, army-ah tha takin duty ila a ni mai,’ tih chang ka nei. Chuti chung chuan hma lam ka thlir a, ka tawngtai a, tunah chuan ka inkhel leh thei ta a, bronze medal ka la ve leh ta a. Ka tan chuan a hlu lutuk,” a ti.
Rinnunga hian Pathian a ring tlat a, a duhnate Pathian hnenah a thlen thin. Inkhelh leh theih a beisei loh lai pawhin Pathian a rin tlat thu a sawi.
“Hei aia ropui zawk hian Lalpan min ‘comeback’-tir dawn,” a ti a, tunah inkhel thei tawh mah se 100%-a inkhel a la nih loh thu sawiin, Pathianin a hruai zel tur thu a sawi.
Kuminah Asian Games leh Commonwealth Games te a awm dawn a, Rinnunga hian rinnain chung chu a thlir mek.