RJD-in SC-ah Bihar-a SIR kalpui khinna thehlut

RJD-in SC-ah Bihar-a SIR kalpui khinna thehlut
Tejashwi Yadav-a kaihhruai Rashtriya Janata Dal (RJD) chuan kumin kum tawpa inthlang mai tur, Bihar-a electoral roll ennawn tuma Election Commission-in thupek a chhuah chu Supreme Court-ah a khing dawn.
RJD aiawh hian advocate hriat hlawh leh hlun tak, Kapil Sibal-a chu a ding dawn a, Thawhtanni khan a rang lama ngaihtuah nghal turin a thlen.
June 24 khan inthlan buaipuitute hian hriattirna tichhuakn Bihar-ah khua leh tui dik takin vote an thlak theih nan Special Intensive Revision (SIR) kalpui turin a ti a. Khawpui thang chak tak te, pem lut tam lutuk te, thalaiten kum an tlina vote an neih thuai theih nan te, thi tawh inhriattir lo an tam vang te leh ram dang atanga lut vote nei an tam lutuk avanga hetiang hi tih ngai niin a sawi.
EC hian hetianga ennawn kalpui hi danpuiin a phal leh dan ang taka tih theih a ni tih a sawi bawk.
Hetih lai hian sawiseltu an tam sawt hle a. Trinamool Congress MP Mahua Moitra-i chuan SIR kalpui tur hi kumin inthlan tura thalai zawkte vote thlak thei lo tura siamna tur a nih thu leh a dawt leha EC-in an bitum tur chu an state, West Bengal a nih thu a sawi.
Supreme Court-a khin tum chungchangah Moitra-i chuan July 1, 1987 leh December 2, 2004 inkara piangte chu vote an thlak theih loh phah dawn niin a sawi a, hei hi sorkar laipuia BJP-in an hlawkpui tur mai mai niin a sawi a. An party chief leh West Bengal Chief Minister Mamata Banerjee-i pawhin a hmain EC thupek chu ‘game plan bawlhhlawh’ tiina sawi bawk.
Congress president Mallikarjun Kharge-a chuan Bihar-a voter-ten saffron party chu mipui rorelna leh danpui an beih avangin zirtirna an pe dawn tih a sawi a, SIR kalpui a nih chuan vote nei vaibelchhe riat dawn paih an ngaih phah dawn niin a sawi.
Congress party kaihhruai INDIA tangrualte pawhin Bihar-ah thil kalpui tum hi an duh loh thu sawi chhuak tawhin Nilaini hian ram pumah duh lohna an lantir dawn nghe nghe.
RJD hruaitu dang, Tejashwi Jha-a chuan SIR chu engvanga Bihar-ah chauh tih tur a ni nge tih a zawt a, kum 2003-a ram puma kalpui nen ngati nge a danglam bika tih a nih a zawt bawk.
RJD bakah hian mipui huap pawl, PUCL leh Association of Democratic Reforms bakah activist Yogendra Yadav te chuan Supreme Court-ah SIR kalpui tumna hi a khinna an thlen tawh.
BJP kaihhruai NDA erawh chuan ennawn kalpui tur hi tha an ti a, eptute chuan ‘inthlana an chak loh huna chhuanlam an neih theih nan’ an sawi buai mai mai niin an sawi.
Pathianni khan EC hian ennawn thawh khatna chu Bihar-ah tluang taka zawh a ni tih an sawi a, tute emaw bik hlawkpui theih tur ang zawnga thil tih engmah a awm lo niin an sawi.
“June 24, 2025-a inkaihhruaina lo puan tawh angin SIR chu tluang taka neih a ni a, tunah pawh inkaihhruaina hi a la danglam chuang lo,” an ti a. Inthlan buaipuite hian tih dan thin pangngai anga SIR hi tiin in tin luh te, live-a thlalak leh voter-te form thehluh ang hmanga tih a ni tih an sawi.
Voter-te hian an lehkha neihte chu July 25 thleng thehluhna hun an nei a, draft electoral roll chu August 1-ah a chhuak dawn a ni.