Rock and Roll Hall Of Fame Class of 2023

Kumina Rock and Roll Hall Of Fame Induction Ceremony chu an rama November ni 3 zan, keini tana November ni 4 zingkarah khan Barclays Center. New Yprk City-ah neih a ni ta a, artist category atangin Kate Bush, Sheryl Crow, Missy Elliott, George Michael, Willie Nelson, Rage Against the Machine leh The Spinners te lak luh an ni a, musical influence atangin DJ Kool Herc leh Link Wray te lakluh niin, musical excellence atangin Chaka Khan, Al Kapoor leh Bernie Taupin te lakluh niin, Don Cornelius chu Ahmet Ertegun Award hlan a ni bawk. Rock and Roll Hall of Fame hian 1986 atangin hall of fame-a lakluh hi a nei tan tawh a ni.
Kumin Rock Hall Calss Of 2023 lakluhnaah hian performer leh presenter chi hrang hrang hip-hop, rock, pop, R&B leh Country atangin Adam Levine, Brandi Carlile, Carrie Underwood, Chris Stapleton, Common, Dave Matthews, Elton John, H.E.R., Ice-T, LL Cool J, Miguel, New Edition, Olivia Rodrigo, Queen Latifah, Sia, Stevie Nicks leh St. Vincent te an inlan a ni.
Kumin hian a vawi khat nan he induction ceremony hi livestream a ni a, Disney+ ah tihchhuah ni a, a audio pawh Apple Music 1-ah live stream a ni bawk a, hei vang hian induction ceremony hi an neih lai la lain fans lamin an lo chhim ve thei a, kum dangah chuan show hi record niin, a hnuah an tichhuak leh chauh thin a, kumin induction ceremony pawh hi TV lama en duh tan chuanJanuary ni 1, 2024-ah ABC-in an tichhuak dawn chauh a ni.
Kumin ceremony hian hmanni lawka kum 90 tling ta, rimawi khawvela legend Willie Nelson chu lakluh zingah telin, RRHOF a lakluh zinga mahni ngei tel thei kum upa ber a la ni. Ani aia upa he hall of fame-a lakluh awm chhun chu Harry Belafonte niin, kum 95 mi a nihin lakluh a ni a, mahse, an lakluhnaah a inlan thei lo thung lo a ni.
He induction ceremony-ah hian Willie Nelson chu lakluh a nih bakah amah ngei pawh a perform a, a hla hit pathum ‘Whiskey River’ (Chris Stapleton nen), ‘Crazy’ (Sheryl Crow nen) leh ‘On the Road Again’ (Dave Matthews, Crow leh Stapleton te nen) a perform a ni. Nelson hian Rock Hall voter-te chu a thiante Waylon Jennings leh Kris Kristofferson te pawh hall of fame-a lakluh an nih theih nana tan la turin a sawm nghal bawk a ni.