Roof Top-ah 21st Edu Fest nei
ZALEN chanchinbu leh Lynchpin tangdunin kumtin an huaihawt thin Edu Fest chu a tum 21-na atan Zirtawpni atang khan Millenium Center Rooftop-ah neih tan a ni.
Edu Fest hawngtu Higher & Technical Education minister Dr R Lalthanglina chuan institution-te nen hmaichhana zirlaite an inhmachhawn chu hlu a tih thu a sawi a. Midang inrawlh ngai loa zirlaiten kawtkaia hetiang hun tha an nei chu an vanneih thu a hrilh. Ram danga hna thawk tura chhuakten midang kaltlanga hna an zawn thin avangin harsatna an tawk fo tih sawiin, hmaichhana inbe chunga admission tih theih a ni chu thil lawmawm tak a ni tih a sawi a ni.
ZALEN editor Vanlalrema Vantawl chuan kan tapchhakah college leh univertsity tha kokhawmin zirlai leh nu leh pate duh thlan tur an neih theih phah a, zirlai sang chuangin kum 20 chhunga Edu Fest an buatsaih tawhah hian zirna tha zawk, a awm ngai pawh tih an hriat loh te an hmu tawh a. Heta lo telte hi UGC/AICTE/NCI adt. accreditation uluk takin an enfiah sak hmasa thin tih a sawi.
Edu Fest-ah hian paramedical courses, nursing, pharmacy, civil engineering, petroleum, agriculture, humanities, allied science, computer science, graphic designing lam bakah Indian Army leh Indian Air Force an inpho a, Yes Bank-in sutdents loan an thutpui bawk.
Roof Top-ah 21st Edu Fest nei
Get real time updates directly on you device, subscribe now.