Ropeway leh a behbawm

Kum nga kaltaah khan, sawrkar laipui Ministry of Tourism atangin cheng nuai 9907 senga tourism tihhmasawnna tur tha tak tak project 10 Mizoramin a dawng a. Heng project zinga a sum hrawm na ber, Durtlang leh Chaltlang inkar ropeway siamna turah thil fel lo tam tak a awm avangin Mizoramin a nghahhlelh em em ropeway chu a thamral leh ta a. Ropeway kan neih theih loh hnu ahmanah, ropeway bunna tura sum lo sen tawh cheng nuai 1509 chu awmze nei lovin a riral lehnghal a.
Swadesh Darshan hnuaia tourism promote-na tur project atan hian Mizoramin Consultant a ruai fuh lo a tih theih rualin, a ruaitu lam pawh an fuh vak bik lo. A chhan chu, Consultant hian DPR-ah site survey te, site clearance dinhmun engmah a tarlang lo a nih pawhin, a ruaitu lamin an ‘question’ tur ni awm tak a ni a. Chuta chhapah, feasibility report pawh a awm lova; chuti chung chuan a ruaitu lam hian sawisel lovin DPR hi an pawm tihna a ni a. Hei mai hi a la ni lo va, a ruaitu lam pawhin cable car paltlang tura power transmission line pathum awmte pawh enfel ve awm tak a ni a, a kaihhnawih department (P&E leh Power Grid Corpn) te pawh biakrawn awm tak a ni bawk. Thil kal tawh hnu mah ni se, he thil thleng hi nakin zel atan inzir fin nan tal hmang tangkai ila a duhawm hle a. Consultant rawih chungchangah pawh, tun aia fimkhur zawka kalpui a ngai hle tih a hriat a. Hetianga ningnel deuh, experience nei tam lo niawm tak ang hi chu an ‘authenticity’ te pawh chik chian zel atan a duhawm hle a ni.
Ropeway project ruala project dang pakuate pawh hi tun thlenga zawhfel loh hi a la awm nual nia hriat a ni a. Sakawrhmuituaitlanga Skywalk chungchang leh tuna ropeway chungchang phei hi chu, court-ah PIL thehluh niin thubuai a awm mek a. Ropeway tih loh, project zinga a lian deuh ber, Tuirial Airfield, cheng nuai 2,139 senna tur pawh hi kum 5 a ral hnuah pawh hian a nih tur ang hi a la ni pha lo hle nia hriat a ni a. Hei pawh hi ropeway ang maia a zuihral loh nan tanlak a pawimawh khawp ang le.
Tourism hi state dang chuan sumhnar tha takah an chantir mek a, ‘tourism lamah potential kan nei tha’ ti reng thin keini hian ‘tan kan la dawn’ tih hi kalsan a hun ve tawh hle.