Aizawl, Sairang leh Lengpui inkar thlunzawm Ropeway siam theih dan a awm em tih chu nimin khan chief minister hova sawiho a ni a. Hei hi tourism chawikanna tha tak a nih theih rualin Aizawl – Lengpui via Sairang inkar inthlunzawmna tangkai tak a nih beisei a ni.
Ropeway han sawi rik tawh hi chuan, Durtlang leh Chaltlang inkar Ropeway siamna tur sum ruahman fel vek a nih tawh hnua puitlin a ni leh thei ta lo kha sawi chhuah a tul leh thin. Kha Ropeway project kha, Mizoramin Swadesh Darshan Scheme atanga Eco-Adventure Circuit hnuaia Cheng nuai 9907 senna tur project 11 a hmuh zinga pakhat a ni a, a sum hrawm na ber (Rs 3114 lakhs) a ni nghe nghe. He Swadesh Darshan (SD1.0) Scheme hi 2016-17 a kalpui tan kha a ni a, sawrkar pahnih (Cong leh MNF) a paltlang nghe nghe a nih kha. Chipchiar zawka tarlanna hmun a awm lo va, duhtawk ila. Tunah hian Swadesh Darshan (SD2.0) Scheme kalpui leh mek a ni a, kan hriat angin he scheme kalpuina tur Champhai leh Aizawl district te chu an lo inbuatsaih mek a. SD1.0 kha Mizoram chuan kan chhawr tangkai lo hle a, SD2.0 tal hi chu a tangkai thei ang bera lo chhawr theih tum tawh ila a duhawm hle a ni.
Keini anga tlangram khawpui, khualzinmiten an tlawh huai huai, state source of income tha tak atana tourism hmang mektu Himachal Pradesh khawpui Shimla-ah khuan kum 1970 atang khan thil tha tak mai an lo kalpui chu ‘public lift’ khu a ni. Tunah hian a hlui zawmin lift thar siam belh a ni leh tawh a, cheng nuai 600 chuang hret an seng ta awm e. A hmingah ‘Tourism Lift’ an vuah a, kawngpui hnuai atanga kawngpui chung lam kal nana hman a ni a, motor kawnga thui tak kal ngai kha, second 90 chhung lekin hahdam leh rang takin, Rs 10 lek sengin an thleng zung zung mai a, englai mai pawhin lift-a chuang tur mihring an intlar zui reng mai a ni.
Aizawl khawpuiah pawh hian khutiang public lift ang khu a dinna tur remchang tak tak (entir nan Vaivakawn leh Temple inkar kawngpui khawi lai emaw atanga Dawrpui han pawh theihna tur ang chi te; chhuah lamah, Electric veng atanga bazar chhuah chhohna tur te, etc…) tam tak a awm thei a ni. Hei hi traffic tawt tihziaawm nan tangkai leh tha tak tur a ni nghal theiin a rinawm.
Kan dinhmun han en hi chuan, a awm sa cheibawl leh ringawt thin lovin, awm lo ata awm tur hi sawrkar hian a ngaihtuah chhuah zung zung a tul tawh a ni ber e.
Ropeway leh Public Lift
Get real time updates directly on you device, subscribe now.
Prev Post
Next Post