FA NAU ENKAWL

JC.Zoremi Hmar Joute
Mihring te hi, Pathianin min siam hmangah hian, a huhoa khawsa chi kan nih mai bakah, chi tamtak thlah tura mal a sawm kan ni hrim hrim a, chutiang tur chuan nupui pasal kan inneih tawn a lo tul ta a, Mizo nun bikah chuan nula tlangval, pathlawi nuthlawi, kan inrim tawna, kan induh tawn chuan nupaah kan insiam ta thin a nih hi.
Hnamdang leh sakhaw thenkhat te phei chuan nupui pahnih pathum nei te pawh an awm hial a, Mizo khawtlang nun bikah chuan nupui pasal pakhat nei thin hnam kan ni, nupa inhmangaih tawn hi a hlu a, a nuam a, rethei deuh mah ila, kan induh tawn miau chuan kan hlim em em thei zel a, heng te tak hian hringnun hi a timawiin a tiduhawm em em a ni.
Mahse Nupa nun hian hlimna ringawt min hlui lo, kan innei a, nupaa kan insiam chiah hian, in leh lo din bakah fanau enkawl leh hreawm tak, thlantui luang zawih zawiha hna thawk tura kan inpeih pawh a tul nghal a ni; a hrehawmah leh a nuamah pawh tiin chhia kan chham hial thin a nih reng hi. Kan ram hi tlangram chhengchhe hmun deuh vek a ni a, thingtlang lo neia eizawng thin kan ni a, Lo kan vat a, kan hal a, mang kan khawh a, Thlam kan sa a, Buh kan tuh leh a, hetah hian zo mai sela kan nuamsa deuh tur, mahse a la tawp lo, June thla tir atanga September thla thleng zak hian ni tin kawla ni chhuak chhiara hlo thlawh a la tul a ni; hei hi Mizorama cheng mi tam zawk hna thawh dan a ni, tun hma phei chuan buh chauh kan ching a, chu pawh ei nghal mai theih a la ni ta chuang lo. Kut ngatin Sumah an la deng fai thin; hetiang hian, kum leh ei tur buaipuia hna thawh leh nghal a ngai a, hna thawk reng rengin kan buai kum tin mai thin a ni. Tuna kan ram Mizoram tia hming mawi tak kan lo neih theih nana kan pi leh pute kalkawng kha a namailo tih hian a hrilhfiah zo lo hial ang. Tunlaiah erawh sum chang thlai chin te kan lo intihhmuh chho ve ta a, thingtlang pa tan pawh nuamsa deuh zawkin ei kan lo zawng thei ta a, a lawmawm hle mai.
Ni leh Kum kan lo chhiar tam ve ta a ni ang, keini ram kilkhawr ber thlengin khawvel hma sawna chuan min rawn chim ve ta a, hma kan sawn rual zel hian sualna chi hrang hrang pawhin min rawn um zui zar zar zela, kan khawtlang nuna thil pawimawh em em lo ni ta chu FA NAU ENKAWL hi alo ni ta a ni, tunlaiah sumdawn leh sorkar hna thawh te a lo hlawk a mi thenkhat tan, hna hrâm tinreng thawh a lo tul tawh lo a ni mai thei, mahse hna hautak ber mai leh huphurhawm ber fa nau enkawl, erawh kan uluk a kan fimkhur a tul ta hle mai. Mihring mizia a inang lo ang bawkin kan fate enkawl thuah hian, chutiang khatiang chuan ti rawh tia inhrilh hleih theih pawh a ni lo. ‘Naupang Enkawl Dan’ tiin mithiam ber ber pawhin lehkhabu ziak pawh nise a hlawhtling vek kher lo ang. A chhan chu, kan mizia mai bakah kan than lenna chhungkua, khawtlang ram leh mimal tin ngaihdan a hrang leh thliah thliah si a, nupaa insiam mai leh fa han neih mai chu pang a dam chuan a theih mai, kan fate enkawl zui dan tur erawh thil dang daih a ni tawh, a harsa a ni.
Social media hi a chak satliah pawh a ni tawh lo, chhung tin mai ni lo, mimal tinin smart phone kan hum thei tawh a, entir nan, kum AD 2000 hnu lama nau piang reng reng chuan Mobile phone hi an rawn thanlenpui tawh a, an tan thil thar a ni ve tawh lo, 1960 chho piang te aiin an khawih thiam rang zawk a, ‘Sex film en suh Drugs khawih suh Zu in suh’ tih vel hian kan thu an awih hle a nih loh chuan awmzia a nei tawh lo. A rukin engkim an ti thei vek tawh si a, a harsa a ni. Drugs addict fanu fapa nei tan phei chuan khawvel hi tah leh ha thialna a ni ringawt, thenawm khawvengte tan lah Ruk ruk hmang, mi hnawksak a lo ni bawk nen, fa sual neih hi tu tan mah a hlawk lo.
ENGTIN NGE KAN TIH TAK ANG.
Kei nu mawl satliah ve mai hian thurawn han inpek tur ka hre tlem hle mai, thil pakhat hriat erawh ka nei. chu chu kohhran belh tlat hi a ni. Kohhran bel han tih hian kan fate Pathian hnena tlukluhpui tih nen thuhmun reng a ni. Naupang, thalai, nu leh pa te, tupawh ni ila kohhran bel mi, an mualpho ka la hre lo.
Kohhran bel mi han tih hian, mahni fate ln lama hnutchhiaha kohhran commitee-a kalsan daih ang chi leh nupa a, fate inkhawm san daih ang chi ho hi ka huam tir lo a nia. Inkawm leh kohhran thiltihna reng rengah kan fate an tel theih dawn loh chuan ln lamah awp lum mai ila, Pathian zarah kohhran mi leh mipui, kan lo hnih thum ve tawh a, ful time deuh zawka kohhran rawngbawl hna thawk chi, nu leh pa chu an awm mai. Kan fate erawh K|P, |KP, SAY, PYD ah te an intah luh hram hram theih nan theihtawp chhuah thung ila, tin nu leh pa te, fa enkawl lai kan nei a nih chuan kan fate kiangah a tam thei ang ber awm tum ve thung ila, kohhran pawn lamah an tuina zawng leh nuam tih zawng tuipuiin tih pui peih ila, nupa a pisa kai thin emaw nitin hna thawka chhuak thin kan nih chuan tu emaw zawkin a hna bansan in, inchhungkhur leh fanau enkawl se la.
Tin, kohhran lam hian Meizial, Zu Drugs leh Ruihhlo lam chi thatlohzia zirtirna lam nei tam se tih hi ka rawt duh a ni.
Hetiang atan hian sum sen pawh huam nasa leh zual ila, kan ram hi dan phal loh thil chi hrang hrang kalkawng a ni a, tan kan lak a tul ta hle mai, kan fate hi Ar ven taka kan ven a ngai tawh tak zet. kan fate tana ro khawlkhawm ai chuan intodelh turin kaihruai thiam ila, chutiang tur chuan kohhran emaw NGO lam pawh hian inzirtirna nei fo ila tih hi ka rawt nawn leh e.