Baptist kohhran thalai, Thalai Kristian Pawl chuan ram rorelna dik a awm theihna’n hma lak a tum.
BCM biak in, Tuipui D ah Mizoram Thalai Kristian Pawl Rorel vawi 69-na chu Zirtawpni khan neih a ni a. MTKP president Upa R Lalrochama’n kaihruaiin pawl hmalakna tur hrang hrang an pawm.
Mizoramah tun aia rorelna dik a awm theih nan MTKP-in hma la rawh se; kan unau raltlante MTKP-in tanpuina pek nise; TKP Unit tin ten mahni remchan angin plastic bawlhhlawh chharna hun vawikhat tal neih ni rawh se; BCM hnuaia damdawi in kan neihahte a theih chin chinah Mizo tawnga ziah nise, tih leh, Youth Centre pual Unit tin vawikhat fehchhuah neih tih te a ni.
Heng bakah hian MTKP hian inzirtirna lam hawi pahnih – ruihhlo that loh zia inzirtir rawtna leh MTKP-in TKP member-te intodelh tura zirtirna buatsaih nise, tih an pass a. Fellowship Department-in budget ceiling a siam angin cheng nuai 15 pass a ni.
Tunah hian Mizoram TKP hi Pastor bial 92 ah awmin Unit 429 an awm mek a; member mipa 29105 leh hmeichhia 18119, an vaiin TKP member zawng zawng hi 47224 an awm a ni. Kum 2022 aia TKP member punna chu 2123 a ni.
Kum 2022 MTKP rorel hnu atang khan TKP member 150 ten chatuan ram min pansan a, heng zingah hian mipa 131 leh hmeichhia 19 an ni a. Innei tuak 699 awmin, Kohhran Dan puitlinga innei tuak 456 niin, Dan te-in tuak 243 an innei.
Rorel inkhawmah hian MTKP hmalakna langsar tak pakhat, tui hna humhalh leh tui renchem inzirtir chungchangah essay inziahsiak, painting competition leh short film intihsiak te buatsaih a ni.
Rorelna dik awm theih nan TKP-in hma lak rel
Get real time updates directly on you device, subscribe now.