Rorelna dik duhtuten sawrkar vil zui an tum

Inthlanah eng political party pawhin sawrkarna siam se, mipuia an intiamna ang an tihlawhtling em tih bih zui zel an tum tih, rorelna dik duhtu intelkhawm chuan an sawi.
Rorelna Dik group member Lalrammawia chuan sawrkar thar tur chu tupawhin kawng dik leh fel an zawhna kawngah chuan theihtawpa tawiawm a, diklo leh thalo erawh dodal turin an ngen tih a sawi. Tu party leh pawl pawhin sawrkarna siam se, ram rorelna an kalpuina kawngah mipui hnena an inzawrh lai leh an hmelmawi an hmatheh hun laia kawng hrang hrang – ram hmasawnna ruhrel siam, sawrkar tha, eirukna do, zirna tha zawk siam, intodelhna kawng zawh leh a dangtea an thutiam, manifesto leh an thusawi record-a awm ang ang, rintlaka an ngaih khawnkhawmin, chutiang atang chuan chu sawrkar thar chu bih zui a ni dawn tih a sawi a. A tul huna an tha ti chak tur leh kawng diklo an zawh changa pawha dodal a, hmalakna awm thei ang anga hma la turin an insiam tih a sawi a ni.
An beisei anga sawrkar thar piang tura chanvo chelhtu leh sawrkarna siamtu party mite hnenah kohhran, para church leh NGO dangte hnenah, sawrkar hnathawk zawng zawng hnenah ngenna leh beiseina an nei tih sawiin, “Mahni inhaivurna, duhamna diklo, hlemhletna, dan zah lohna mahni leh mahni pawh inzah zo loa nawmsak thlakhlelhna avanga Pathian leh mipui zah zo lo hiala ngaih theih a, nun leh thiltih kawng hrang hranga ke pen a awm theih thin. Chutiangah chuan mipui tawrhna thlen thei thil leh rilru piansualna kawnga mihring min hnuklut thei lamah tlukluh a awl a. Ram roreltute pawhin an rorelsak mipui hlamchhiah a, nihna leh dinhmun pek an nih avanga an chanvo chelhte chu an hmangsual ve thei foa. Hei hi damdawi hmangsual kan tihte aimaha midang tana chhiatna thlentu a ni thei zawk hialah kan ngai,” Lalrammawia hian a ti.
Rem leh remlo chung a, mahni party sawrkar leh puchuamte thlavang hauh tumsa, a fawng vuantu lahin ke pen dik tawk loh avanga mahni thusawi leh manifesto sawipial mam tumna te a awm loh a, ram rorelna fel lo leh mihring nun zah lohna hnuaia tharum thawh duhna hial kan ramah a thlen loh a, Pathian avanga ram tha zawk kan nei theihna turin mipuiin finchhuah a, chakna nei thei hial tura intawiawm tlang turin mitin an sawm tih an sawi a ni.