Rorelna fel lo lakah mipui kan thikthu a chhiat a ngai – Christina

AMC corporator Christina Roluahpuii chuan Zoram mipui chu rorelna fel lo lakah kan thikthu a chhiat a ngai tawh a, ZPM chuan sawrkar tha zawk siam an tum a, an danglam ngam dawn tih a sawi.
Thawhlehnia Sialsuka ZPM Aizawl South III Joint Block Conference a hmanpuinaah AMC corporator chuan, tuna kan ram dinhmunah hian kan lung a awi a nih chuan, kan rama ro lo rel tawh leh tuna min kaihruaitu mekte kan vote leh thei a, mah se, tun aia hma sawn a, thawkrimte dinchanna hmunah kan ram kan siam thei ang tih ringtu kan nih chuan ZPM candidate-te vote turin a sawm tih a sawi.
ZPM chuan term khat emaw term hnih emaw chuah an aupui loa, kum za chuang daih an aupui an ti ngam tih sawiin, “Kan tu leh fa lo awm zel turte tana hmasawnna awm tur lungphum phum kan tum. Pathian zara ZPM-in sawrkarna kan chang a nih chuan kuthnathawktuten ngaihsak an hlawh dawn tih vawi tam kan sawi tawh a, thlai hralhna chungchangah harsatna an tawk tawh dawn loa, mithiamte kaihhruaina hnuaiah thlai an ching tawh dawn a ni. Chutih hunah chuan agriculture sector-in kan GSDP-ah hmun a luah hnem ve tawh anga, chu chuan hmasawnna a khairual tih a entir bakah kan ram economy a chawikang dawn a ni,” a ti.