Rorelna lian zawk Lok Sabha hi Zofate tan hneh taka al a tul – Dr R Lalthangliana

Rajya Sabha MP ni lai mek K Vanlalvena chuan rorelna lian leh member tam zawkna Lok Sabha chu Mizo mipui tan hneh taka a al leh a tul avanga MP candidate-a vawrhchhuak an ni tih MNF senior vice president Dr R Lalthangliana chuan a sawi.
Mamit district lama Lok Sabha inthlan campaign-a fehchhuak Dr R Lalthangliana chuan, Pu K Vanlalvena’n Rajya Sabha Mp ni chunga Lok Sabha a chuh leh chhanah duham vanga ngaite pawh awm theih a ni, tiin, “Rajya Sabha chu a al hneh tawk tawh a. Rorelna lian zawk leh member pawh tam zawkna Lok Sabha hi hneh takin al leh se, Mizo mipui tan a pawimawh a ni,” a ti.
Tunah hian ZPM chu MLA 27 neiin chak viau angin lang mah se, MNF pawh party malin kum 2018 khan MLA 27 an nei tho a, Congress leh MNF angin ZPM chuan ruhrel nghet a nei ve loa, an sawrkar hi hnatlang party ang deuh niin, party leh pawl hrang hrang infinkhawm, enchhin anga inzuar an ni, tiin, “Thla thum tha zet kan enchhin ta a, rin ang he hu an nih loh hmel ta riau mai,” a ti.
MP candidate KVanlalvena chuan tun tum MP inthlan turah a party ang zawnga en lo a, mipuiin rilru fim tak hmanga ngaihtuahna seng hram hram turin a ngen tih a sawi. “Min thlangtling a nih chuan kan ram leh hnam, sakhua a him theihna turin Pu Duhoma leh a minister-te pawh hi tha takin ka thawhpui thei ang. Mizo mipui tana thatna tur a nih chuan, ka tawrhna tur pawh nise, thu dik leh thu tha ka tan tlat zel ang. Parliament House chhung leh pawnah pawh thudik chu ka tan tlat zel dawn a ni,” a ti.