Round 2 lut zingah Swiatek kan hmu
Round 2 lut zingah Swiatek kan hmu
Wimbledon khelh tan tak hmeichhe singles first round match pakhatah Thawhtanni khan world number one Iga Swiatek chuan 6-1, 6-3-a Chinese Zhu Lin hnehin grass-court grand slam title hmasaber a beiseina kawngah hna hmasaber a hlenchhuak phawt.
Kum 22-a upa Pole hian thla hmasa mai khan a vawithumna atan French Open title lain, a trophy dahthatna chhuarah grand slam title pali hung ve tawh mah se London tournament lianah hian fourth round a la pel ngai lo.
Karliamta Zirtawpni khan a dam that loh avangin Wimbledon inbuat-saihna hnuhnung Bad Homburg semi-final atangin a inhnukdawk a, Thawh-tannia world number 34 a hnehna kawngah erawh taksa lama harsatna a neih hriat a ni lo.
Wimbledon junior champion lo ni ve tawh Swiatek chuan a la chetthat ve lohna tournament kal mekah first round a paltlang rualin a inringtawk tih a sawichhuak a, “Roland Garros (French Open) ai khan ka boruak a kang zawk mahin ka hria,” a ti.
French Open leh US Open cham-pion Swiatek hi women’s title la tura beiseiawm ni mah se, tarlan tawh angin, SW19-ah hian last eight pawh a la thleng ngai lo a, kum 2018-a junior title a sualchhuah bak Wimbledon-ah hian chhuan tur a la nei lo a, chu chu a dinhmun ni mah se London major tournament khel tura inbuatsaihna a kalpui lai khan Swiatek hian all-court player an tih ang chi nih a duh thu sawi chungin tunhma zawng aia All England Club-a chetthat a duh thu a sawi.
A bultanna match-ah top seed Swiatek hian harsatna tawk loin hnehna a chang ta phawt a ni.
Venus eng a chuai hma
First round inkhel dangah Wimble-don-a vawinga champion tawh Venus Williams chuan women’s singles draw-a tum 24 a inlannaah first round a paltlang zo lo thung a, kum 43 mi ni tawh hi Ukraine player Elina Svitolina chuan 6-4, 6-3-in a hneh.
American veteran Williams hi hliamin a tibuai a, khel zo thei lo dinhmuna a din hial hnuah set hnih a tlingtla thei hram a; inkhelh banah a vanduai thu sawi chungin a hun tawn kha a rin phak bak a nih thu a sawi.
A khup dinglam tuam bur chungin Williams khan bul a tan ve reng reng a, a tumruhna leh huaisenna bakaha a tawnhriat avangin 2019 semi-finalist Svitolina lakah khati chen kha a tang thei zawk mai mai niin a lang!
Open era an tih huna Wimbledon singles-a tum 24 inlan thei awmchhun American mihang khelmual chhuah-san tur hi mipuiin ‘standing ovation’ nen an thlahliam.
World number one hlui hian kum 1997 khan a vawikhatna atan All England Club-ah tournament a khel tan a, kuminah wildcard hmanga invawrh leh tum mah se first round a paltlang zo lo a, a chawl zui ve tawh dawn em tih chu tennis khawvel ngaihven a ni.
Hmeichhe result dang
American tleirawl Coco Gauff chu player langsar leh thleng sang thei tura beiseiawm zinga tla hmasaber ni turin qualifier Sofia Kenin chuan 6-4 2-6 6-4-in a hnawtchhuak.
Seventh seed Gauff hnehtu Kenin kha 2020 Australian Open title a lak hnuah ranking-a a hniam zawng zelin a kal a, hliam vang leh coaching set-up fuh lo vanga talbuai a ni.
Zirtawpnia Wimbledon draw-ah Grand Slam champion hlui Kenin hi kum 19 mi nena intawng hmasaber tura pawh niin, All England Club-a a vawikhatna atan Gauff chuan first round a paltlang zo ta lo a, kum 15 mi lek ni chunga vawinga champion tawh Venus barakhaiha kum 2019 Wimble-don last 16 a thlen boruak nen kha chuan a dan a dang ta!
Kum 24 mi Kenin bakah hian American fourth seed Jessica Pegula leh French fifth seed Caroline Garcia-te paw’n second round an lut ve bawk.
Kum 29-a upa ni tawh Pegula hian a chipui Lauren Davis lakah 6-2 6-7 (8-10) 6-3 hnehna changin, Garcia hian 6-4 6-3-in American player dang Katie Volynets a paltlang ve thung.
|um hnih Grand Slam champion ni ve tawh, Wimbledon semi-finalist hlui ni bawk Belarusian 19th seed Victoria Azarenka pawh 6-4 5-7 6-4-a Chinese Yue Yuan hnehin first round paltlang zingah a tel a; Russian 11th seed Daria Kasatkina pawhin 6-1 6-4-in American Caroline Dolehide kal zel tur a dang.
Russian 12th seed Veronika Kuder-metova pawhin a tumhnihna atana second round lut turin kum 38 mi ni tawh Estonian veteran Kaia Kanepi lakah 7-6 (7-4) 6-4 hnehna a chang.
Gauff bakah tournament tan ni khan seed chang tla nghal dang an awm a, Russian seeded 15th Liudmila Samsonova chu 7-6 (7-1) 7-6 (7-4)-in Romanian Ana Bogdan lakah a tlawm a; Chinese 24th seed Zheng Qinwen pawh Czech Ka-terina Siniakova lakah tlawmin, Spaniard Rebeka Masarova chuan Egyptian 31st seed Mayar Sherif a hnawtchhuak ve bawk.