RRF vang bawkin…

Mizorama kawngpui laih leh a kaihhnawihah forest dan bawhchhiatna nasa tak a awm nia hria in, environmental activist pangate chu Supreme Court-ah an zualko a. Forest department dan tlawhchhan mumal awm loin Mizoram Environment Forest & Climate Change department chuan RRF leh RSRF huam chhunga hmasawnna hnathawh a lo phalsak a, hei hian Forest Conservation Act 1980 a kalh a ni mai loa, EF&CC PCCF leh principal secretary hoa thukhawmin RRF huam chin chu forest ni zel tura thutlukna a lo siam tawh chu a kalh, an ti a. Supreme Court chuan Mizoram sawrkar leh NHIDCL hnenah Riverine Reserved Forest leh Road Side Reserved Forest of Mizoram huam chinah dan ang thlapa Forest department atanga phalna an hmu a nih loh chuan hemi huam chhungah hmasawnna hna thawk rih lo turin a hriattir a. Hemi chungchang hi kumin July 24-a ngaihtuah leh turin Supreme Court chuan a ti a.
Kawngpui tha kan mamawh a, mahse kawngpui laihin dan a kalh avangin hna thawh chhunzawm theih lohvin chawlhsan a han ngai leh rih a. July ni 24 thleng hna chawlhsan a nih hnuah, court thutlukna azirin hmasawnna hna hi chhunzawm theih a ni dawn nge, chhunzawm theih a ni dawn lo tih hi tihchian tur a la ni chauh mai a. Dan kalha thiltih a hlawk lohzia a lo lang leh ta a. Fur ruahtui a lo tla chho leh ang a, kumin chhungin hmasawnna hna thawh theih hun chhung a tlem leh hle dawn niin a lang.
Hetiang deuh bawk hian NIT Mizoram (Lengpui) hmun chungchangah pawh khan RRF thilah bawk rei iak kan lo buai tawh bawk. National Institute of Technology hi India ramah 31 chauh a awm a, state leh UT 36 zingah Mizoramin pakhat kan chang ve a, a lawmawm tehlul nen, forest clearance chungchang avangin hun rei tak hna chawlhsan a ngai a, temporary campus-ah zirlaite harsa takin an awm phah a. NIT Mizoram hi 2010 atanga bul tan kha niin, Thenzawla dah tura ruahman, a hnuah Lengpuia dah leh tak kha a ni a. Campus sak hna tan a nih hnuah forest clearance fel loh avangin hun rei tak hna chawlhsan a ngai a, nikum June thla khan Ministry of Environment, Forest & Climate Change chuan ‘In-principle approval’ min pe tiin khatih laia forest minister khan House-ah a sawi thei chauh a nih kha.
Department lamin dan an ngaih pawimawh tawk loh avanga hmasawnna hna a thuanawp phah ta fo mai hi, sawrkar lam an inenfiah a ngai hle niin a lang.