RS MP nekchep a ni – MNF Thalai

RS MP nekchep a ni
– MNF Thalai
Rajya Sabha MP K Vanlalvena chu Aizawla a chenna quarters-ah nekchep zawngin state sawrkar a che niin MNF Thalai chuan an sawi a. A thlavang an hauh tlat dawn tih an sawi.
MNF Thalai Hqrs. thuchhuak chuan, Tuikhuahthlanga Legislator’s Home-a cheng mek Rajya Sabha MP hi a lirthei dahna, garage-ah ZPM contractor pakhat chuan thuneitu sang zawk atanga thu hmu anga insawiin toilet sak tumin hna a thawk tih sawiin, ‘MP-te hi VIP an ni a, an chenna atanga chhuak tur leh khawih danglam tur a nih chuan official-in hriattir thin an ni. Engmah hrilhlawk loa hetianga hma laa hna an thawk hi mak kan tiin kan dem a ni,’ a ti.
Legislator’s Home-ah hian electric short vangin chimney a chhe vek a, Rajya Sabha MP tih loh quarters dang luahtu zawng a thar pek vek an ni tawh tih pawh sawiin, ‘MP chungah hetianga hmuhsitna leh nekchepna a thleng hi pawi kan tiin kan rilru a na a, a thlavang kan hauh a, hemi chungchanga thil dik lo titu hi chhuichhuak a, a phu tawk hremna pe turin sawrkar kan phut a ni,’ a ti.