Champhai South bialtu MLA, minister TJ Lalnuntluanga chuan Ningani zing khan District Hospital Champhaia tlawhin RT PCR bun hna thawh mek, Trauma Centre sak mek leh Nursing School Champhai kalpui thuai a nih theih nan a tulte a enfiah.
-- Advertisement --
Minister chuan thlen chin leh hmabakte, harsatna tawhte inhrilhhriat zung zung a, an mutan hriata bawhzui tlan zel a pawimawh tih a sawi a. Office dawhkana sawi ho mai loin official, contractor, engineer, khawtlang hruaitute leh media lamte nena a hmuna en ho chuan awmzia thui tak a nei tih a sawi. Mipuiin an nghahhlelh leh ngaihchan reng hmasawnna ruhrel pawimawh an nih hlawm avangin theihtawp chhuaha tangruala a ranglama zo thei tura bawhzui tlan a tul tih a sawi bawk.
Eye Ward building-a RT PCR khawl bun nana hmunhma chei mek hi cheng nuai 18 vel senna tur niin, zaa 90 dawn zawh a nitawh a. Bungrua a thleng kim deuh vek tawh a, hmunhma peihfel veleh bun tum a ni. Ministry of H&FW sum nuai 81 senga sak mek Trauma Centre, Hospital Casualty nena sak zawm pawh hmalak tawhna leh harsatna awmte a hmunah sawi ho a ni a. Hna hi zaa 90 vel zawh tawh niin, Trauma Centre-a dah tur ICU khum 10, ventilator unit 2, Bipap unit 2, monitor para 5, 2-function ICU cots unit 10, syringe pump unit 2 leh infusion pump unit 2 pawh Give Foundation & Mission ICU atangin District Hospital Champhai a thleng tawh a ni.
Nursing School building pawh TJ Lalnuntluanga hian tlawhin, kumin chhunga class kalpui a nih theih na’na hmalak tulte sawi ho a ni a. Post siam ngai tihfel tawh niin, bungraw mamawh lei tul cheng nuai 100 man dawn thehluh tawh a ni bawk. Hengte hi pawma pek chhuah a nih veleh Nursing School kalpui tura tulte tifelin, kumina class tan hman tuma hma lak a ni. Nursing Hostel sak mek pawh tlawhin hnathawh dan a enfiah a, contractor-te hna tlo leh tha hun bituk chhunga zo turin a chah.