Ruah leh thli vangin Delhi-ah power supply awm lo nasa

Ruah leh thli vangin Delhi-ah power supply awm lo nasa
Inrinni zan zankhuaa ruah nasa taka sur leh thli tleh nasain power pek chhuahna tam tak a tihchhiat avangin India khawpui ber, Delhi leh a chhehvel hmun tam takah Pathianni khan power supply an nei lo hlawm.
Power supply hi Delhi hmar lama Bawana, Ghogha, Sector 25 Rohini, DSIIDC Narela, Sultanpuri, Sector 22 Rohini, Karala, Badli, Siraspur, Avantika, Mangolpuri, RU Block Pitampura leh Rithalaah a awm lo niin Tata Power Delhi Distribution Limited (TPDDL) thupuangtu chuan a sawi.
“Kan team-te che chhuakin a that leh thuai theih nan an thawk a. Himna atan hmun thenkhatah power supply tihtawp ve hrim hrim a ni bawk a, a pangngaia kalpui leh theih thuai a ni ang,” a ti.
BSES discom hnuaia awm – Mundka, Jaffarpur, Hari Nagar, Madipur, Tagore Garden, Chhatarpur, Pitampura, Rohini, Model Town, Mukherjee Nagar, Timarpur, Mayapuri, Sangam Vihar, Nand Nagri leh Karawal Nagar-ah pawh ruah leh thli thawk avang hian power an nei lo bawk.
BSES thupuangtu chuan Inrinni zan atanga hmun eng emaw zata power pek khaihlak chu tui tling nasa lutuk leh thing tlu leh a zar tlain electricity hruite a tihchhiat nasat vang niin a sawi.
“BSES Operations & Maintenance team-ten an inring reng a, Quick Response Team (QRT) pawhin complaint an dawnte chu rang takin a bawhzui zel a ni,” a ti.
Thupuangtu hian buaina tam zawk chu rang taka chin fel a ni tih a sawi bawk.
Hetih lai hian hmun thenkhat erawh tui tlingte nghah kang a ngaih avang leh thing tluin a delh chhiatte senghawi hmasak a ngaih avangin hun a duh rei ve deuh thei niin a sawi bawk.
Thli leh ruahpui vanawn sur hian thlawhna thlawk lut leh chhuak pawh a tibuai hle a, thing tlu leh electricity ban tluin hmun tam taka inkalpawhna a tibuai bawk.
India Meteorological Department chuan Inrinni zan dar 11:30 leh Pathianni zing dar 05:30 inkar khan thli chak zawng chawhrual chu darkar khata kam 82 vel lai a nih thu leh ruah pawh mm 81.2 a sur hman thu an sawi.