Ruah sur har, sur tlem rih bawk

Ruah tui tamna Mizoramah kuminah ruah a sur har a, tunah rih chuan ruah tui pawh a tlem rih. Tlem zui lo tura beisei erawh a ni.
State Meteorological Centre chhinchhiah danin, Aizawlah kuminah ni khat chauh ruah a la sur a, March ni 15, Nilaini khan ruah tui MM 19.4 a sur.
Mizoramah hian ruah hi kum khat chhungin thla tin a sur deuh ziah a, nikum pawh khan thla tin a sur. 2022 January-ah khan MM 23.9 a tla a, February-ah MM 17.2 a tla. Kuminah erawh January leh Februaryp-ah a sur ta lo phawt.
State Meteorological Centre lam chuan nikum January thlaa sur hi tam lo angin lang mah se January thlaa surah chuan a tlem lo an ti a, February thlaa mi pawh hi February thlaa sur atan chuan tlem an ti lo.
Nikum March thlaah khan MM 53.3 a tla a, kuminah chuan March-ah pawh ni khat chauh a la sur. India Meteorological Department lamin Zirtawpni atanga Thawhtanni thlengin Mizoram hmun hrang hrangah ruah a sur thei tiin an thlirlawk a, rial leh thli na vak lo a tel mai thei an ti bawk. He thlirlawkna hi a thlen dik chuan March-ah nikum ang zat vel emaw, a aia tam eawm ruah tui a tla thei tiin State Meteorological Centre lam chuan an sawi.
State Meteorological Centre chhinchhiah danin, nikumah khan ruah tui a tam bakah a pung a; 2021-ah MM 1917.6, 2022-ah MM 2015.1 a tla.
Directorate of science and technology hnuaia State Meteorological Centre hian sik leh sa leh khawchin hi kum tin an chhinchhiah a, an chhinchhiah china Mizorama ruah tui tam ber kum chu 2017 kha niin, MM 2686.7 a tla. A tlem ber kum chu 2019 kha a ni a, MM 1518.2 a tla.