Ruah sur nasa vangin state pariata luite hlauhawm a ni mek

Ruah sur nasa vangin state pariata luite hlauhawm a ni mek
India-a fur ruah sur mek zelah Assam, Bihar, Uttar Pradesh, Jharkhand, Madhya Pradesh, Uttarakhand leh West Bengal-a lui tam tak chu hlauhawm chin chhinchhiahna chung lamah a luang mek hlawm a, hmun hniam laia chengte dinhmun a tiderthawng mek a. Tlang ram state-a ruah sur nasaten heng luite hi a tilian nasa hle.
Uttarakhand-ah chuan Alaknanda, Mandakini leh Bhagirathi luite chu Rudraprayag, Tehri leh Haridwar district-ah hlauhawm chin chhinchhiahna chung lamah a luang mek.
Rudraprayag-ah hian Mandakini chu hlauhawm chin chhinchhiahna, metre 1,976.8-ah luah mekin Alaknanda chu chhinchhiahna chung lam metre 0.6-ah a luang.
IMD chuan Uttarakhand-ah hian Uttarkashi, Rudraprayag, Chamoli, Bageshwar, Pithoragarh, Udham Singh Nagar, Dehradun, Nainital, Champawat, leh Pauri Garhwal district-ah te ruah a la sur chhunzawm dawn tih sawi lawkin luite hi a tilian zual hle tura ngaih a ni.
Himachal Pradesh-ah pawh ruah sur nasain lei min leh tui lian a thlen nasa a. Central Water Commission Flood Forecast Monitoring Directorate-in Nilaini tuka a tihchhuahah River Ganga leh a pengte chu Bihar leh Uttar Pradesh hmun eng emaw zatah hlauhawm thei niin a tar lang. Tui lian viltute pawhin ‘orange bulletin’ an tichhuak.
Bihar-ah chuan Ganga River hi Patna, Bhagalpur, Buxar, Vaishali leh Bhojpur district telin hmun 20 velah hlauhawm a ni tawh.
Patna-a Gandhi Ghat-ah chuan Ganga hi metre 49.87-ah luangin hlauhawm chin chhinchhiahna chung metre 1.27 a ni tawh a. Kahalgaon-ah pawh chhinchhiahna chung metre 0.69-ah a luang tawh.
Bihar-a lui lian dang – Burhi Gandak, Baya, Kosi, Bagmati, Gandak leh Punpun te pawh tui lian thlen mai thei an ni mek hlawm.
Gopalganj-ah Gandak River chu metre 70.05-a sang chim thlengin hlauhawm chin chhinchhiahna chung metre 0.45 a ni tawh a, darkar khatah mm 50 vel zelin a chim sang.
Patna-ah Sone River chuan metre 52.99-a sang chimin hlauhawm chin chhinchhiahna chung metre khat dawna sang a chim thleng tawh tihna a ni.
Assam-a Hailakandi-ah Ghormura chu hlauhawm chin chhinchhiahna chung metre 1.69-a sang chim thleng tawhin Katakhal River chim chin pawh a sang tawh hle a. Tinsukia-ah Buridehing River pawh hmun hniam deuh laia chengte tan chuan hlauhawm a ni phak tawh.
Uttar Pradesh-a Varanasi-ah chuan Ganga River chu metre 72.2-a sang chim tawhin hlauhawm chin chhinchhuahna chung metre 0.94-a sang a chim mek a. Ghazipur-ah hlauhawm chin chhinchhiahna chung metre 1.59-ah luangin Yamuna River chuan Prayagraj-ah hlauhawm chin chhinchhiahna chung lam metre 0.73-a sang a chim tawh bawk.
Ballia, Mirzapur, Allahabad leh Phaphamau-ah pawh lui lian mekin hlauhawm a thlen hnai zel bawk a. Chitrakoot-a Paisuni River chu hlauhawm chin chhinchhiahna chung metre 1.25-a sangah a luang tawh bawk.