Ruah sur ngun, mahse sur tam lutuk lo

Beisei lawk angin July thlaah khan ruah a sur ngun a, mahse a tam tia sawi tur khawp chu a ni lo. Tam vak lovin a sur ngun a ni ber awm e.
State Meteorological Centre-in an chhinchhiah danin thla liam ta July-ah khan ruah tui mm 360.8 a tla a, hei hi July thlaa tla tura ngaih ang vel a ni.
July thla hi Mizoramah ruah sur thla a ni a, a tam thla pawh a ni. Kumin July thlaa ruah tui tla zat kha, khatiang zat vel kha July thlaa tla tura ngaih a ni.
A tam tia sawi tur ni lo mah se ruah hi a sur ngun a, State Meteorological Centre-in an chhinchhiah danin, July thlaah khan a sur loh ni chu ni li chiah a awm.
A sur ngun na a, tam em ema a sur chu a awm vak lo tiin a sawi theih; ni 19-ah khan mm 91.2 a tla a, hei hi chu a tam. Ni 8-ah mm 73.6 a tla a, hei pawh a tam. Ni 21-a tla zat mm 46.8 pawh a tam tia sawi theih chu a ni ang. Ni dangah chuan a tam lo a, mm 10 a tlin loh ni a awm nual.
State Meteorological Centre-in an chhinchhiahna enin, July thlaa ruah a tam ber chu 2019 kha a ni a, khami kum July-ah khan mm 539 a tla. A tlem ber kum chu 2000 kha a ni a, khami kum July-ah khan mm 66.9 a tla.
State Meteorological Centre hian 1986-ah ruah tla zat hi an chhinchhiah tan a, 1986 atanga 2025 thlengin July thlaah chawhrualin ruah tui mm 322 a tla ziah ang a ni. Chu ai chuan kumin July-a tla hi a tam zawk a, chutih rual chuan 2000 July-ah a tlem lulai em avang leh kum dangah pawh July-a a tam loh chang a awm avangin, 1986 atanga 2025 thlenga July thlaa ruah tui tla zat chawhrual hi a hniam phah lo thei lo ve bawk.