Rual banlohna in a tuk tlawm zawh loh hlawhtling pathumte
Pianphunga rual an phak lohna in a tih beidawn zawh loh mi pathum chu combined competitive exam paltlangin state service-ah an tling a. Persons with Disabilities commissioner office chuan lawmpuina a buatsaih. Mizoram Combined Competitive Exam 2023-ah PwD quota-in Mizoram Civil Service-ah khaw hmu thei lo Lalngaihawmi, Mission Veng; Mizoram Finance & Accounts Service-ah ke tha lo Lalremtluanga, Zemabawk North leh, Mizoram Information Service-ah khua hmu lo N Vahneichhi an tling a. PwD office hian Fedaration of Mizoram Disabilities Organisation nen tangdunin Nilaini khan Aizawlah lawmpuina an hlan. N Vahneichhi hi an khua Siaha-ah lawmna pui buatsaih sak a nih avangin a tel ve thei lo a ni.
N Vahneichhi tel theih loh avangin, thusawitu PwD commissioner Vanlaldiki Sailo chuan a chanchin a sawi a. Piantirha mit del a ni a, kum 5 mi a nih laiin SCERT-in an awmna Siaha-ah an va zawngchhuak a, Luangmuala mitdel school-ah a lut ta tih a sawi. “He school neitu leh an zirtirtute, lehkha zirtir mai ni lo, a zun leh ek then ngai pawha thensak a, a dam loh tum pawha enkawl thintute he hunah hian ‘credit’ ka pe duh a ni,” a ti. N Vahneichhi chu mi tumruh tak nia a hmuh thu a sawi bawk.
Rights of Persons with Disabilities Act 2016 tih hlawhtlin kawngah sawrkar department dangte nen an thawk ho tha a, 4% aia tlem lo reservation atangin PwD mi 100 dawn laiin sawrkar hna an hmu tawh a, an lawm hle tih a sawi. Tunah ‘top post’ tih theiha hlawhtlinna an hmu ta chu lawmawm a tih thu sawiin, “Tun amite hian theihtawpin thawk ula, chhawr chakawm leh zawngchhang tlak ni turin, in hnunga in naute tan kawng sialtu ni ang che u,” a ti.
LALNGAIHAWMI:
Nikhua a hriat tirh atanga khaw hmuh dan fel lo tawh, a dan tur ve reng emaw tia seilian chho Lalngaihawmi hian pawl 10 a zirlai, kum 17/18 a nih atangin mit darthlalang tha lo natna a nei tih a hrechhuak. A natna hi muangchanga chhia a, a tawpa mitdelna ang chi a ni. “Tleirawl nih laia hetiang tawn chu a na duh khawp mai. Hma hun neiah ka inngai tawh loa, mi tana phurrit ni turah ka indah,” a ti A inthin harh hnu ah open class atangin pawl 12 a zir tha leh a, a zo. Pachhunga University College-ah a zir a, an college zirtirtuten an phurpuiin an nawr nasa a, academic line-a kal tur chi nia inngaihna a nei chho ta tih a sawi. University of Hyderabad ah a zir zawm a, a titha ber pawl niin a zo. NET (National Eligibility Test) a paltlang hnu ah PU College-ah semester 7 chhung guest assistant professor-in a thawk a, doctorate degree tih a tum mek laiin heti lamah hian a hawi ta a ni.
Combined Competitive Exam hmachhawn tum hian a lo inziaklut ve tawh a, exam erawh a hmachhawn lo. Tun hi a hmachhawn vawikhatna a ni.
“Min puitu ka ngah a, mitha an tam zia hmuchhuakin ka inhria. Ka chhungte, ka thawhpuite, ka classmate te, ka zirlaite thlengin min pui nasa a ni. Sawrkarin PwD tan reservation siam lo se ka apply ngam loang; min puitu leh sawrkar chungah ka lawm a. Ka vanduaina hi vanneihnaah a chang a ni ber e,” Lalngaihawmi hian a ti.
Khua a hmu loa, kaih ngai, ei inna hmunah pawh a bika buaipui ngai a ni thin. Kaih a ngaih avanga a rui emaw ti te, ei in buaipui ngai a nih avanga inti no leh pangchang nia ngaite pawh an awm tih sawiin, “A tirah chuan ka ‘feel’ ve em em thin a, tunah chuan ka engahmah a thawk tawh lo. An ngaih ngaihin lo ngai se tih hi ka ngaihdan a ni tawh,” a ti.
LALREMTLUANGA:
Thiamna lamah kum 2001-a MA Economics zo Lalremtluanga hi kum 1986 khan naupang ala nih laiin motor accident avangin a ke khing khat a sawp a, enkawl leh siamthat ngai reng a nih avangin lehkha zir laia damdawi ina luh a ngai ngun a, mi aia beih nasat a ngaih phah thin tih a sawi. Zirlai a ni a, hostel-ah te a awm. A ke chhiat avangin mi aia hmaa thawha lo inpuahchah a ngaih chang a tam a, midangin a ke a tha lo tih an hriat hlau reng renga a awm chang a tam a, lo deu deuhtu tawn chang pawh a nei thin tih a sawi.
“Ka rual banlohna hi ka zak ve thin a, mi zingah hrehawm ti takin ka awm thin,” a ti.
MA a zawh hnu hian zirtirtu hna a thawk a, a hnu ah TVS company-ah sales manager-in a lut. Ama tan leh chhungkaw tana awmze nei zawk nih tumin, kum 2007 khan competitive exam atangin DM&R department-ah field officer-in a lut. A hnu ah FCS&CA department-ah junior accounts officer chu competitive exam bawkin a zawm a ni.
“DM&R-a ka thawh lai hian field-ah kan chhuak tam a, ka ke a tha lo tih an hre thin loa, keiin thup hram tumin ka bei a, ka taksa in a tawrh phah nasa a, ka hna tur ni loah ka ngai ta a ni ber,” Lalremtluanga hian a ti.
State service exam – MCS bikah vawi 3 leh MPS ah vawi 8 a hmachhawn tawh a, competitive written exam hrim hrim phei chu a hmachhawn tam tawh hle tih a sawi. “Ka rual ban loh puite ka chah duh chu, kan inthlahrung a ni thei a, mahse, theihna kan nei a ni. Tumah zam lo ang u,” a ti.