Hlawhtlin pui ngei turte banah chauh kan kai ang – CM

Sawrkar policy – ‘Bana Kaih’ ah hlawhtling lo tur chiang sa, ruling party nih vanga duhsak ngawt an tum loa, duhsak bik nei loin hlawhtlin pui ngei tur chauh an thlang dawn tih chief minister Lalduhoma chuan a sawi.
Nilaini khan NABARD bultumin Mizoram State Credit Seminar 2024- 2025 buatsaih a ni a. Hmanpuitu chief minister chuan thlai tharchhuah lam, thil siamchhuah leh service tha siam theite tanpui turin ‘Hand Holding Policy’ an kalpui dawn a, central sponsor schemes nena kaihkawp tur niin, bank-ten mawhphurhna pawimawh tak an chelh dawn tih a sawi.
A dawngtu tur thlan thu ah ruling party mi leh sa, hlawhtling lo tur tih chiang reng an duhsak ve ngawt dawn lo tih sawiin, “Chu’ng mite vang chuan sawrkar policy a lo hlawhchham fo tawh a, bank pawhin an hnena loan pek in hreh thin tih kan hria. Tumah duhsak bik leh duh loh bik nei loin, mipui sawrkar kan nih angin, a hlawhtlinpui ngei tur chauh kan thlang dawn a, uluk takin line department-ten an vil zui ang. Bank tan chu’ng mite puih chu a nuam zaih tawh dawn a ni,” a ti.
Mizoramah NABARD kaltlanga hmasawnna hnathawh a tam em em a, hmachhawp pawh an ngah a, an tangkai hle tih chief minister hian a sawi a. Thlai chinna tur short term loan (KCC) chu uar zawka mipui hnena thehdarh tha a tih thu te, PACS (Primary Agricultural Credit Societies) kan neihte mumal leh uar zawka hman tangkai tha a tih thute, self help group tana sum leh pai remchang tam zawk siam tha a tih thute a sawi a ni.
Chief minister bakah hmanpuitu dang Agriculture minister PC Vanlalruata te chuan sawrkar scheme kaltlanga pek loan thahnem tak, bank hrang hrang sanction order chu seminar-ah hian loan hmutute hnenah an hlan a ni.