Rualbanlote Ni hmang

National Institute for Locomotor Disabilities (NILD) leh SCERT Chaltlang buatsaihin Thawhlehni khan Aizawlah Rualbanlote Ni (International day for Persons with Disabilities) hman a ni.
He hun hmanpuitu Persons with Disabilities commissioner Vanlaldiki Sailo chuan rualbanlote dikna humhalh leh an talent haichhuah sak zel a pawimawh tih a sawi a. Sawrkar hna in a daih dawn loh avangin private sector-a thawk turin rualbanlote buatsaih zel a tul tih a sawi.
“Rualbanlote hian kawng hrang hrangah hma an sawn a, chutih mek laia nuihza siam nan leh fiamthu thawh nana hmang an awm a nih chuan PWDs commissioner hnenah complaint thehlutin, anni’n rang takin hma an la dawn a ni. Danin a humhalh tlat avangin ruaibanlote hi him tak leh hlim taka nun an hman a pawimawh hle,” a ti. PwD commissioner hian wheelchair a sem nghal a ni.
Federation for Disabled Organisation secretary Nicky Chhakchhuak leh Mizoram Blind society advisor Lalbuatsaiha ten fuihna thu an sawi a. Rualban lo aiwh NGO hrang hrang leh special school hrang hrang an tel. Shining Star School, Redeem Garden School, Ephatha Special School, Special Blind School, Differently Abled Society leh Mizoram Blind Society ten zai leh lam an entir a ni.
NILD hian rualbanlote tan hmalakna hrang hrang an kalpui a. Wheelchair, cp chair, beng dar, ke lem, kut lem, tiang chỉ hrang hrang leh MR kit te a mamawh hnenah an sem thin a ni.
December 3 kha khawvel puma rualban lote ni ‘World Disabled Day’ a ni a. Remchan zawkna avangin December 5 hian Aizawlah chuan hman a ni ta a ni.