Rubber Board hotuten CM leh CS kawm

Rubber chin leh hralh kawnga hlawk zawka kalpui dan tur buaipuia Mizorama rawn kal Rubber Board of India chuan Ningani khan chief minister Zoramthanga leh chief secretary Dr Renu Sharma a hran ve ve in an kawm.
Chief minister chuan Rubber Board hmalakna lawmawm tiin, economy tihhmasawnna atan thil tha tak, Mizoram leh hmarchhak state dangte pawhin an thatpui phah ngei a beisei tih a sawi a. Transportation cost tihhniam na’na link road siam chungchanga mamawh an thlen chu a remchan dan anga theihtawp a chhuahpui tur thu a hrilh.
Rubber Board of India executive director Dr KN Raghavan chuan chief minister hi Mizorama rubber chin hmalakna sawipuiin, state sawrkarin a tawiawm tawhnaah lawmthu a hrilh. India hmarchhak state-in rubber-ah potential a neih that avanga ngawrh taka rubber chinah hma lak a nih dan sawiin, kum 5 chhunga hectare nuai hniha zau rubber hmun north east region-a siam tum a nih thu leh Mizoram pawh a huam tel thu a hrilh bawk. Kumin chhung hian Mizoramah hectare 1600 a zau a rubber phun tum a nih thu leh a tiak hi a thlawn a sem a nih thu te, awlsam zawkna’n nursery siam tum a nih thute a sawi a ni.
Chief secretary an kawmnaah Rubber Board hotute hian Mizoramah kum 2021 khan office hawng tanin, Soil & WC department hnuaiah hma lak a nih thu te, Mizoramah rubber chingtu anmahni hriatpui mi 1200 an awm thu te an sawi.
Mizoramah thelret hmun siam leh tharchhuah chu loneituten kan la hmelhriat lutuk loh avang leh mi tam tak tan thil thar a nih avangin inhrialhriat leh inzirtir a tul tih chief secretary hian thu a sawi.
Mamit district-a Kanhmun, Hortoki leh hmun thenkhatah loneitu tlem azawngin kum 2009 atang khan thelret hi an phun tan a. Farmer thenkhat chuan a hlawkna an tel tawh a ni. Rubber Board-in hma a lak mekna hi hmun kilkhawr leh lirtheiin a tlawhpawh loh ram a nih avangin inkalpawhna kawng mamawh a nih thute sawi ho a ni.
Rubber Board of India hi Ministry of Commerce & Industry hnuai ami niin, rubber industry hmasawnna’n hma a la a ni.