Rubber Missions-ah Ha.11500 a zauah rubber chin khah vek tum

On Dec 9, 2025 2 0

Rubber Missions-ah Ha.11500 a
zauah rubber chin khah vek tum
Mizoram Chief Minister Rubber Missions kalpui turah kum 5 chhungin hectare 11500-a zauah rubber chin khah vek tum a ni dawn tih chief minister Lalduhoma chuan a sawi.
Thawhtannia Chuhvel rubber chingtute Zau panna kawng a hawnnaah chief minister chuan Land Resources, Soil & Water Conservation department-in a chhinchhiah danin Mizoram-ah hectare 50000 a zauah rubber a chin theih a, a chinna tlaka ngaih hmun thuma thena hmun khatah pawh kan la ching lo tih a sawi.
2024 December 16 khan Mizoram Chief Minister Rubber Missions an hawng a. A hawn ni hian hna an thawh tan maina tur cheng vaibelchhe 27.98 sanction-na lehkha chu NABARD atangin an dawng nghal tih a sawi a ni.
Department chhinchhiah danin, Mizoram bikah rubber kung puitling pakhat atangin kum khat chhungin rubber hnai kg.2 atanga kg.4 thleng a thar theih a. Hectare khata zauah a tlangpuiin kum khatah kg. 1000 – 2000 vel a thar theih tihna a ni a; tunlai market rate anga chhutin hectare khata zauah Rs. 1,80,000 atanga Rs. 3,60,000 vel a lakluh theih tihna a ni tih a sawi.
CM Rubber Mission phase-I ah Mamit leh Kolasib district-a cluster 24-ah hectare 1000 a zau huamin rubber tiak 450000 phun a ni a. Phase-I hnuaiah Mamit district-in hectare 844 an chang tih a sawi.
2025- 2026 sawrkar kum chhungin phase-II kalpui leh mek a ni tih a sawi a. Mizoram-a district hrang hrangah hectare 2575 a zauah rubber tiak 1158750 phun chhuah leh vek tum a ni a; Mamit district tan bik hectare 1316 ruahman a ni tih a sawi bawk.