Ruihhlo do hotu thin hmunah cocaine lab hmu chhuak

Ruihhlo do hotu thin hmunah cocaine lab hmu chhuak
A ram hmun pakhat atanga cocaine lab an hmuh chhuah hnuah Bolivian police chuan an rama ruihhlo donaa hotupa ber thin an man a. Hetih lai hian lab hi a hmunah hian a awm tih a hria em tih hriat a ni lo.
Felipe Cáceres-a hi kum 2006 atanga 2019 inkar khan ruihhlo do hna thawktu sorkar department hotu ber a ni a, Bolivia-a ruihhlo tawlh donaa thawk nasa tak a ni.
Cáceres-a man a nih hma hian Bolivia-a ruihhlo dotu zinga an hotu pakhat pawh US-ah ruihhlo tawlh vangin a thubuai ngaihtuah hmabakin a awm mek a, pakhat dang lung inah a tang mek bawk.
Bolivia hi Colombia leh Peru dawta khawvela cocaine siam chhuak hnen ber an ni.
Kum 63 mi, Cáceres-a hi Thawhlehni tuk khan Cochabamba region-a Puerto Villarroel-ah man a ni a, helai hmun hi an rama coca chinna hmun langsar tak a ni.
Coca hnah hi thingpui atana an hman niin an ei thin bawk a, Bolivia-ah chuan kum za chuang kal tawh atangin an ching tawh.
Bolivian danah chuan hectare 22,000-a zauhvah damdawi atan, hnam tih dan leh sakhaw thila hman atan chin phal a ni a, a aia zau chin erawh tihchhiat theih a ni.
Ruihhlo do pawl enkawltua sorkarin a ruah hma hian Cáceres-a hi coca chingtu pawla an hruaitu a ni thin a. Tun tumah hian police chuan a hmun pakhatah laboratory pakhat, coca hnate cocaine hydrochloride-a siamna an hmu chhuak tih an sawi a, hei hi Bolivia leh ram ang tam takah ruihhlo anga chhiar a ni.
Bolivian Interior Minister Roberto Ríos-a chuan mi 10 vel chhawr theihna lab hi Cáceres-a ram chhungah hmuh a ni tih a sawi a, a neitu a ni em tih chhui mek a ni tih a sawi.
Ríos-a chuan Cáceres-a hi lab bul hnai mai, metre 500 leka hlaah an man tih a sawi.
Ruihhlo dotu hotu a nih lai khan Cáceres-a hi khatih laia an president, Evo Morales-a nen an inkawmngeih hle a. Thuthar lakhawmtute hnenah Morales-a hian Cáceres-a man a ni chu sorkarin a ruahman a nih a rin thu a saiw a, an laka buaina awm mek atanga mi mit lak sawn nan an ti a nih a rin thu a sawi.