Ruihhlo hi dawt a ni tih hrilh

“Ruihhlo hi dawt a ni,” a ti a, “A lem a ni,” te pawh a ti. Chutiang chuan sikul naupangte a hrilh a, ruihhlo a lo tih ve tawh avanga a inchhirzia leh miin ti ve miah lo se a duh thu te a sawi.
Ningani kha International Day against Drug Abuse & Illicit trafficking a ni a, khawvel pumah ruihhlo dona ni a ni. Aizawla he ni hmannaah chuan ruihhlo lak atanga tal chhuak mi pakhatin ruihhlo hi dawt a ni tiin a sawi.
Dawrpui Multipurpose Hall-a hun hmannah ruihhlo bawiha lo tang tawh, chuta tanga tal chhuak pahnihin an testimony an sawi a, an inchhir thu an sawi.
A sawi hmasa zawk chuan, “Ruihhlo hi dawt a ni. Rei lo te min tiphur ve thei a, amaherawhchu, a lem a ni,” a ti.
Ruihhlo a lo khawih avanga a inchhir thu a sawi a, “Ruihtheihthil a tel chuan rilru fim a put theih loh,” a ti.
Ngawiveina chu khuarkhurum nen inanga a hriat thu a sawi a, khuarkhuruma tlate chu an tla thla puat mai a, a chhuah leh a har tiin a sawi.
“A chhuah lam a har khawp mai. Puitu an awm a ngai,” a ti a, leilawn an rawn thlak a nih pawhin an rap tliak a, chhuah a har tiin a sawi.
“Hun rei tak ka tlu a, a chang chuan ka nun kha a beidawng a, ka chhuak thei dawn lo emaw ka ti a,” tiin ruihhlo a khawih laia a dinhmun a sawi. “Pathian khawngaihna azarah chhanchhuahna ka chang a. Harhfim hi a nuam lutuk,” a ti.
“Inchhir i duh chuan ruihtheihthil ti rawh. Hlawhchham i duh chuan ruihhlo ti rawh,” tiin zirlai kalkhawmte hmaah a sawi a ni.