Ruihhlo hlauhawm meth man tur a awm reng a, kuminah pawh an man hnem leh tawh hle. Excise force te’n nikum kum tluana an man aia tam kuminah an man tawh.
Mizoram Excise & Narcotics (MEN) department-in kuminah May ni 31 thleng khan meth hi kg 112.528 an man tawh a, hei hi 2023 kum tluana an man aiin a tam tawh.
Nikum khan kg 99.506 an man a, kuminah February thla thlengin kg 96.485 an man hmah. Kum tir thla hnih chhungin an man hnem a, March hnu lamah chuan chuti taka tam an man rih lo.
Ruihhlo hlauhawm meth hi methamphetamine tih kaih tawi a ni a, khawvel ruihhlo lar leh hlauhawm a ni. Mizoramah man tur a awm deuh reng a, mahse he ruihhlo lakah hian Mizoram a la him nia ngaih a ni.
MEN department hotute chuan Mizo thalaite an la himah an ngai a, Mizoramah man tur awm ve reng mah se Mizorama an man hi hmun danga mi tur a ni an ti.
Meth hi khawchhak lam atangin khawthlang lam hmun hrang hrangah an la a, Mizoram hi a kawng a nih avangin man tur pawh a awm thin tih chu MEN hotute sawi dan a ni.
Mizorama rawn lut hi India ram state thenkhat leh foreign te pawh a thlenga hriat a ni a, Bangladesh-a lut te pawh a awm a, chuta
tang chuan middle east lama thawn te pawh a awm nia hriat a ni.
MEN hotute chuan meth hi Mizoramin a hmelhriat hmain a hlauhawmzia inzirtir hman a ni a, hei hi a hlawk hle an ti.
2020 leh 2021-ah khan meth hi an man tam lo a, 2020-ah kg 45.547 an man a, 2021-ah kg 12.268 an man. 2019-ah khan kg 146.129 an man a, hei hi 2019 atanga 2023 thlenga an man tam ber kum a la ni.
Ruihhlo hlauhawm meth man hnem leh tawh
Get real time updates directly on you device, subscribe now.
Next Post