Ruihhlo kan do loh chuan min hneh dawn a, kan beih a ngai – Lalnghinglova Hmar

Ruihhlo kan do loh chuan min
hneh dawn a, kan beih a ngai
– Lalnghinglova Hmar
Ruihhlo chu kan beih loh chuan kan tlawm tawh tihna a ni a, kan do loh chuan min hneh dawn a ni, tiin, ram chhanna thil a nih avangin tih tak taka beih a ngai tih Excise & Narcotics minister Lalnghinglova Hmar chuan a sawi.
Excise & Narcotics minister ho hian Inrinni khan Lungleia sawrkar official-te, tlawmngai pawl hrang hrang, kohhran hrang hrang leh District MJA hruaitute chu Lunglei district-a ruihhlo do kalpui mek dan thlirho leh hmalak zui zel dan ngaihtuahin an thukhawm a. Minister chuan Mizorama ruihhlo hluar zel chu engtin nge tangrualin kan do ang, tih ngaihtuah a ngai tih a sawi.
Kohhran, NGO leh sawrkar tanhona chuan awmzia a neih ngei a ring tih sawiin, “Sawrkar, NGO, kohhran leh khawtlangin mahni hmazawnah kan thiam dan danin ruihhlo kan do theuh a, sawt zawka kan do theihnan hma kan lakna inhriat tawnpui a tul. Sawrkar chuan NGO leh kohhrante nen awmze nei zawka thawh ho a ngaipawimawh a ni,” a ti.
Sawrkarin ruihhlo do a ngaihpawimawh avangin Excise & Narcotics Department pawh a thuamchak mek tih Lalnghinglova Hmar hian a sawi a. Saitual, Khawzawl leh Hnahthialah Excise Station thar hawn a ni a, lirthei 18 (ke pali nei 14 leh ke hnih nei 4) lei belh tura ruahman a ni a, thawktu sub-inspector 7 lak tawh bakah inspector, SI, ASI leh constable lakbelh tura ruahman a ni tih a sawi. Ruihhlo donaah chhungkua tanrual a pawimawh, tiin, a bikin chhungkaw pate chhungkaw veina lamah than harh a, tan a ngai tih a sawi a ni.
District bawrhsap Navneet Mann chuan district administration atanga ruihhlo do kawnga hma an lak dan a sawi a. Thalai leh zirlai zingah ruihhlo ti lo tura intiamna leh inzirtirna kalpui a ni a, ruihhlo ngaite enkawlna hmun hrang hrangah thu tha inhrilh leh hriselna endikna kalpui a ni a, November 14 khan peer educator 25 training pek an ni a, khaw tinah ruihhlo do kawnga hma la tur village level task force din mek a ni a, January 2025-ah chuan din kim hman beisei a ni tih a sawi.
END commissioner Z Lalhmangaiha, Lunglei SP J Lalmuankima, Lunglei Municipal Council councillor-te, District Education officer, Sub-Hqrs YMA hruaitute, kohhran aiawhte leh MJA atangin hma an lakna leh an ngaihpawimawh zawng ngaihthlak a ni. Lunglei district-a ruihhlo do kawngah Police, Excise & Narcotics, YMA leh VDP ten thawh hona tha tak an nei a, ruihhlo pawh a kiam viaua a lan laiin tunhnaiah a hluar thar leh deuha a lan thu sawi a ni. Hunpui vuakvetah ngawrh zawka hma la tura ruahman a ni a; DC office, Police, School Education, YMA leh kohhran hrang hrangten mahni pual leh thawkhoin zirna in, kohhran thalai leh vantlang zingah ruihhlo that loh zia inzirtir dan sawi a ni bawk. Lunglei district-a ruihhlo ngai leh a zuarte dinhmun bakah ruihhlo a hluar zel lohnana hmalakna leh hmachhawp sawiho niin, tan lak ngaihna leh thawhho dan tur sawi a ni.