Ruihhlo leh cyber crime beihlet…

Tunhnaia Aizawl SP atana dah thar Rahul Alwal chuan pawikhawihna hrang hrang titlem tura tan lak a tul rualin, ruihhlo leh cyber crime titlem tura beihpui thlak a ngai tih a sawi a. SP hian he thu hi a dinhmun thar a luah veleha thuthar thehdarhtute hnena a sawi a ni a, police-te hi ruihhlo leh cyber crime a hluar tawhzia hrechiang berte an nih avangin an thlir dan hi a dik hle dawn tih a hriat.
‘Ruihhlo leh cyber crime beihlet nan beihpui thlak a ngai’ han tih hian, tute emaw pa pek mai a awl viauin a rinawm. Police an awm alawm, an indaih loh pawhin thawktu lak belh mai tur, han tih liam mai te pawh a awl viauin a rinawm bawk.
A bikin ruihhlo do chungchangah phei chuan, tunhma atang tawhin sawrkar aimahin pawl hrang hrangte hmalakna ri hi a ring zawk emaw tih mai tur a ni a, sawrkar a lo awm awl mai mai e tihna ni chuang lovin. Ruihhlo dona lamah na na na hi chuan tha pawh kan thawh nasa hlawm vek ang, a sawrkar leh pawl ang zawng pawhin. Mahse kan dinhmun chu heti hi a la ni reng a, a zualzawpui vai-len-hlo tih zawng zawng kan chang zo a, Police hotu inthlak tharte pawhin ‘beihpui thlak a ngai’ an la ti reng mai a nih hi.
“Beihpui thlak” han tih leh ngawt hi, a hming chu ropui viau mah se, ‘beihpui thlak’ phawk chhuak zo tur hian beihpui hi kan la thlak tak tak thin lo ni te hian a hriat a, chuvangin, beihpui thlak tak tak tur chuan kil hrang hrang atanga thawhhona fuankhawm a pawimawh a, chumi tur chuan ral pui phiara phiar a ngai a ni. Khawi lai emawa motor check nghek nghek ringawt te, ram chhunga lo lut ruihhlo manchhuah tuma veh kual vak vak ringawt hi beihpui thlakna a la ni phak tak tak lo. Hengte hi chu englai pawha tih makmawh a ni reng tho a.
Ruihhlovin kan rama bu a khuar thuk tawhzia chu tuna naupang kum tling lo zinga ruihhlo tih ching a rawn hluar tak zel atangte hian a hriat theih a, ruihhlo lo luhna Khan Pui dan chah te, ram chhunga ruihhlo lo lut a tam thei ang ber manchhuah te, ruihhlovin a tihbuai mek enkawl dan ngaihtuah te, ruihhlo la ti ve loten ruihhlo an tih lohna tura tanlakte hi “beihpui thlak” chuan a huam vek a ngai. Cyber Crime beihlet dan turah pawh, mipuiin complain thehluh nachang an la hre tawk lo nia an sawi hi a dik em em ang a, mipui pawhin hei hi ngai pawimawh ila, cyber crime hluar zel tur hi a veng ngeiin a rinawm.