Ruihhlo ngai punkhawm thinna thenfai tum dawn

Ruihhlo ngai punkhawm thinna thenfai tum dawn
Excise & Narcotics minister Lalnghinglova Hmar hoin department hotute leh Vaivakawn Siamtha Pawl chu Ningani khan an inkawm a, Vaivakawn huamchhunga ruihhlo ngai pungkhawm thin then thianghlim dan tur an ruahman.
Vaivakawn Siamtha Pawl (VSP) report danin, Aizawl veng hrang hrang bakah khaw dang atanga ruihhlo ngaiten Vaivakawn an pan khawm thin a. An punkhawm tam lai chuan mi 200 chuang tling thinin, khawlai hmun ualau tak taka inchiu an awm fo avangin nunau tan a him loa, rukruk leh inrawk pungin biak in, Anganwadi Centre, YMA Property House bakah mimal in engemawzat rawk a ni tawh.
Pawl hrang hrangin eitur an pe thin chuan ruihhlo ngai pungkhawm a tih tam phah tih sawiin, eitur pe tur chuan hriattir hmasa thin turin VSP hian thuchhuah an lo siam tawh tih an sawi bawk.
Excise & Narcotics commissioner Z Lalhmangaiha sawi danin, an zirchiannaah helaia pungkhawm zinga zaa 80 vel chu mahni chenna in nei, mahse ruih duh vanga Vaivakawn leh a chhehvela kal an ni a. Kalkhawm thin zingah hian TBCC atanga chhuak zaa 60 vel, Hulhliap Project atanga chhuak zaa 5 vel, a bak chu hmun dang atanga kalkhawm an ni.
Department lamin tlaivarin Aizawl khawpui chhungah mobile duty an nei thin tih a sawi a ni.
Minister chuan ruihhlo ngaiten Vaivakawn, Rangvamual leh a chhehvel awmkhawmna hmunpuia hmang a, an kalkhawm chu a veiawm takzet tih sawiin, “Khawtlang nen tangrualin ‘A Senchi Lane’ tia an sawi pawh tihrem a ni tawh a, khawtlang nen tangrual bawkin ruihhlo ngaite hmunpuia an hman thin hi tihrem kan tum tur a ni,” a ti.
Thutkhawmah hian ruihhlo ngaite leh zu in miten an veng chu kalkhawmna leh riahkhawmna tura ngai a, an pungkhawm thin chu tha an ti loa, nunau leh khawtlang tana a him loh avangin titawp a nih theihnan thian thianghlim turin Excise & Narctics Department leh Vaivakawn Siamtha Pawl thawhho nise an ti.