Thla khat chhungin lirthei thar 2300 chuang

Lirthei a tam a, a pung zel bawk. A pun dan pawh hi pung naran a ni lo, a pung chak khawp mai.
Transport department-in an chhinchhiah danin, thla liam ta June-ah khan Mizoramah lirthei 2333 ziah luh thar a ni a, Mizorama lirthei awm tawh zat leh mihring zat atanga chhutin thla khat chhunga lirthei thar zat hi a tlem lo.
May thlaah khan lirthei ziahluh thar 2539 a awm a, June-a mi aiin a tam. July ni 16 thlenga Mizorama lirthei awm zat chu 4,13,099 a ni.
June thla chhunga lirthei ziahluh tharah hian a tam ber chu two wheeler a ni a, 1842 chu two wheeler a ni. 22 chu two wheeler taxi a ni a, a dang 1820 chu mimal hman tur (non transport) a ni.
Heavy goods vehicle 12, light goods vehicle 94, light motor vehicle 320, light passenger vehicle 36, medium goods vehicle 10, three wheeler 3 te ziahluh thar a ni a, lirthei chi dang 16 a awm bawk.
Kuminah July thla thlengin lirthei 15,936 ziahluh a ni tawh a, nikum kum tluana ziahluh zawng zawng zatve aiin a tam. Nikum khan 30,022 ziahluh a ni. Kuminah July-ah pawh lirthei 1,025 ziahluh a ni tawh.

January-ah 2403
February-ah 2191
March-ah 2569
April-ah 2876
May-ah 2539
June-ah 2333