Ruihhlo tawlhruknaah a bupui chhu fuh

Myanmar atanga Mizoram leh Manipur kaltlanga ruihhlo tawlhruknaah Narcotics Control Bureau leh a thawhpuite chuan a bupui an rawn thawng fuh a. Mizoramah pawh he thila inhnamhnawih mi engemawzat hriat chian an ni tawh.
The Aizawl Post-in thu a lakna hrang hrang atanga a lan danin, he thil hi tunhnaia hriatchhuah niloin, kum 2024 vel atanga an lo chhui chhoh tawh, tun hnaia thleng nena la hmehbel chhoh zel theih a ni a. Mizoram, Manipur leh Assam-a hmun 38 vel chu October 23 khan team 38-a inthenin dap a ni a, he thila sum chevel hi cheng vaibelchhe 100 chuang niin, bank account 1424 chu khawih chet theih loha hren sak an nih bakah in hmun lo ram leh thil hlu dang hrang hrang cheng vaibelchhe 17.82, sumfaiin nuai 12 bakah thil dang pawh man tel a ni.
Heng mite hian inthurualin India, Myanmar leh Bangladesh inkarah heng ruihhlo tawlh leh thehdarh hna hi thawkin heng chetvelna hi a hmingah ‘Death Triangle Corridor’ tia vuah sak an ni.
He thilah hian Mizoram mi pawh engemawzat an tel tih thu dawn a ni a. A bikin Champhai leh Zokhawthar lam mi telin 7 an tel tih finfiah a ni tawh. An zingah hian Zokhawthar kaltlanga Myanmar leh India pawisa inthleng tawnna (Rupee – Kyat exchange) kalpui thin Lalliansanga leh a nupui Lalrampari, Champhai te chu he thilah hian an inhnamhnawih ngei tih hriat a ni a. Tun tumah hian Champhaia an sumdawnna hotel leh dawr pawh hren zingah a tel tih thu dawn a ni bawk.
Lalrampari hi 2024 August 8 khan NCB hian ruihhlo kaihhnawihah an lo man tawh a, an nupa bank account ah hian ram chhung hmun hrang hrang atangin sum chetvelna tam tak chhui theih niin, Myanmar pawisaa thleng turin India pawisa cheng vbch. 268.80 a lut tih hmuh chhuah a ni a, cheng vbch. 125 chu a sumfaiin an dawng tih hriat a ni. An ni hi Myanmar lama heroin leh methamphetamine rawn supply-tu hnena a sum pe let tu ber nia ngaih an ni.
He thila a bul tumtu nia hriat chu, Myanmar lam mi Thangcintuang, Bulfek Chin State mi a ni a; a ni hi NCB-in Delhi-ah an man tawh. NCB hnuai bakah Champhai Police leh Excise & Narcotics pawhin a lakah hian thubuai ziahluh an lo nei nual tawh a ni.
A ni bakah hian Mizoram/Manipur paltlang tura buaipuitu Vungkhawthawn leh Assam lama lo buaipuitu Abu Saleh @ Saifuddin, Cachar Assam pawh man an lo ni tawh a ni.
He thilah hian NCB chuan Enforcement Directorate, Assam Police leh Mizoram Police bakah agency dang a thawhpui a ni.