Ruihhlo vangin mi 49-in nunnna chan tawh

Ruihhlovin thalaite a tibuai a, vanduaithlak takin
nunna chan phah pawh an awm; Mizoram Excise & Narcotics (MEN) department chuan kuminah Mizoramah mi 49-in nunna an chan tawh tiin an chhinchhiah.
An chhinchhiah danin, August ni 23 thleng khan kuminah mipa 40 leh hmeichhia pakuain ruihhlo vangin nunna an chan tawh a, nikum kum tluana nunna chan zat aiin kumina mi hi an tam zawk. Nikum khan mi 43, mipa 39 leh hmeichhia paliin ruihhlo vangin nunna an chan tiin an chhinchhiah a ni.
Kumina nunna chan mi 49-te vanduainaah hian heroin a tel vek; MEN department chhinchhiah danin, mi 48 chu heroin leh ruihhlo dan tih pawlh an ni a, pakhat chu heroin leh alprazolam tih pawlh a ni.
An chhinchhiahna enin, 1984-ah ruihhlo vanga nunna chan an awm tan a, kumin August ni 23 thlengin mi 1785, mipa 1571 leh hmeichia 214-in ruihhlo vangin nunna an chan tawh.
1984 atanga kumin August ni 23 thlenga ruihhlo vanga nunna chanah hian a tam ber chu S/Proxyvon leh Parvon Spas vanga vanduai an ni a, mi 1161 an ni. Hetiang damdawi hi a chhuak tawh lo a, chumi hnu-ah chuan heroin hi nunna la nasatu a ni.
An chhinchhiahna enin, 2015 atangin heroin hi nunna la nasatu ber a ni a; hemi kumah hian mi pakuain an vanduaipui. S/Proxyvon leh Parvon Spas vanduaipui pawh pali an awm. 2016-ah mi 26-in heroin an vanduaipui a, mi pahnihin S/Proxyvon leh Parvon Spas an vanduaipui. 2017 atangin S/Proxyvon leh Parvon Spas vanga nunna chan an awm tawh lo.