Ruihhlo vangin mi 700 chuang man tawh

Ruihhlo engemaw zat an man tawh a, ruihhlo vangin mi engemaw zat an man tawh bawk; Mizoram Excise & Narcotics (MEN) department-in kuminah NDPS Act hmangin ruihhlo vangin mi 724 an man tawh.
Nikum khan ruihhlo vanga kum tluana mihring an man zat chu 739 a ni a, kuminah September ni 15 thlengin mi 724 an man a, thla riat leh a chanve chhunga an manin nikum kum tluana an man zat a pha thuak!
MEN department hian kumin September ni 15 thleng ruihhlo vangin NDPS Act hmangin mi 724 an man a, September ni 15 thlengin kuminah NDPS Act hmangin ruihhlo vangin case 409 an ziak lut tawh bawk. Nikum khan kum tluana case an ziah luh zat chu 543 a ni a, chu pawh chu kuminah an pha thuak tawh.
NDPS Act hi ruihhlo dona dan a ni a, 2023 khan he dan hmang hian mi 1088 an man. 2022-ah mi 801 an man a, 2021-ah mi 580, 2020-ah mi 574 an man. 2020 leh 2021 tea kum tluan an man aia tam kuminah an man tawh.
Damdawi ruihhlo vanga an man aia tam hi zu vangin an man a, kuminah September ni 15 thlengin zu khapna dan MLP Act hmangin 4067 an man tawh. He dan hmang hian case 4502 an ziak lut tawh bawk.
Kum hmasateah pawh ruihhlo vanga an man aiin zu vanga an man hi an tam zawk thin a, 2024-ah pawh khan NDPS Act hmanga an man (739) aiin MLP Act hmanga an man (5587) a tam zawk. Hemi kum hian MLP Act hmangin case 6211 an siam. 2023-ah MLP Act hmangin zu vangin mi 5536 an man a, case 6288 an siam.
Zu vanga mihring an man hnem tawh bakah zu pawh an man hnem a, kuminah September ni 15 thlengin tualchhung zu litre 42487.380 an man tawh. 2024-ah khan kum tluanin litre 59694.420 an man a, kumina an man zatin a thlau tawh lo. Kumin hian thla riat leh a chanve chhungin zu bilh lai pawh tin 86515 1/2 an man tawh a, dawidim kg 278.100 an man tawh bawk.