Ruihhlo zawrh nana hman 2 wheeler
taxi permit cancel tura hma lak rel
Aizawla two wheeler taxi hmanga ruihhlo sem kual tih reh a nih theihna’n Central YMA chuan Transport minister TJ Lalnuntluanga an sawipui.
Central YMA hruaitute chuan tunlai hian heroin zawrhna leh semkualna atan two wheeler taxi service hman a ni thin nia an hriat thu an sawi a. Minister hian a theih anga hma lak zui a, hemi chungchang hi Transport department a lo sawipui tur thu a lo hrilh.
Hetiang ti thin two wheeler taxi khalh man chhuah an awm a nih chuan an permit cancel thlenga hma lak a ngaih theih thu an sawi a. Transport department leh CYMA tangduna two wheeler taxi neitu- awareness campaign nei tura hma lak nise an ti.
Central Anti Drugs Squad chuan heroin zawrh leh semkualna atana two wheeler taxi hman a nih thin thu hi thla engemawzat kalta atang khan an lo hre tawh a, hemi kaihhnawiha man pawh an lo nei tawh thin.
Central YMA hruaitute hian Forest minister ni bawk TJ Lalnuntluanga hi Forest Reserve huam chhunga dan loa thing zai thin an awm thu pawh sawiin, hemi chungchang pawh hi Forest department-a thawktute nen theihtawpa tan lak an tum thu in a lo chhang a ni.
Ruihhlo zawrh nana hman 2 wheeler taxi permit cancel tura hma lak rel
Get real time updates directly on you device, subscribe now.