Myanmar-a Run lui lei a chhia a, hei hian kawng hrang hrangin Mizoram a nghawng. Zokhawthar-ah chuan hna a vang a, an eizawnna ber a tlakhniam avangin chhungkaw engemaw zatin a nghawng mek.
June ni 8-ah khan Run lui lei hi Myanmar sipai te’n bomb hmangin an tichhia a, he lei awmna kawngpui hi Mizorama bungraw lakluhna kawngpui pawimawh a ni. Lei chhiat hnuah Mizoramah a hma angin bungrua a lut tam thei ta lo.
Champhai district-a Zokhawthar khua, |iau lui kama awm, Myanmar atanga Mizorama bungraw lutte thlen khawmna khuaah bungrua a lut tlem ta a, thil thenkhat phei chu thleng tawh lo a awm.
Zokhawthar atanga thu dawn danin, khaw thil a lut mang lo a, thawmhnaw leh puan lam thil te pawh a lut mang lo. China leh ram dang atanga bungraw thleng thinte kha a thleng tawh lo.
Eichawp thil, thlai lam a thleng a, Chin hills vela an thar, apple, butter fruit, dawnfawh, theihai te a thleng a, mahse tam tham a thleng lo.
Myanmar lam atanga Mizorama bungraw lutte hi Zokhawthar ep-a awm Khawmawi, Myanmar lam khaw tawpah an phur thleng a, chuta tang chuan lei kanin Zokhawtharah an thiar thin. Hei hi mi engemaw zat eizawnna, chhungkaw engemaw zat innghahna a ni a, bungrua a thlen mumal loh hnuah Zokhawthar lama mi engemaw zat eizawnna a nghawng ta a ni.
“Eizawnna a nghawng a, nghawng teh reng e… hna hi a tlem ta a, kan khaw sum hnar a buai ta a ni,”
Zokhawthar VC president Lalmuanpuia chuan a ti.
An khaw thenawm Khawmawi pawh a nghawng tih a sawi a, bungraw lo thleng thiar vel chu an hna pawimawh a nih ve tho avangin, hna a vang ve tho tih a sawi.
Sipaite tihchhiat lei hi Tahan leh Khawmawi inkara mi a ni a, hei hi Mizoram leh Tahan lam inkalpawhna kawng pawimawh a ni. Myanmar-ah sorkar a mumal loh avangin lei siam tur pawh hi an awm lo tih theih a ni a, sipai sorkar lamin an siam thei lo a, sipai sorkar paih tumtu lamin an siam thei hek lo. He lei chhiat hnuah khawchhak lam atanga Mizorama lut thil thenkhat chu a vang a, thil man to ta pawh a awm nual.
Run lui lei chhiat vangin hna vang
Get real time updates directly on you device, subscribe now.
Prev Post