Russia hnenah inkahhai puang turin Trump-a’n hun tlem zawk pe

Donald Trump-a chuan Russia hnenah tiam chin tawi zawk pe tharin Ukraine nena an indo mekah Thawhtanni atanga chhiar tana ‘ni 10 emaw, 12 emaw’ chhunga inkahhai pawm turin a ti.
US president hian muanna a awm theihna turin hun rei ‘nghah chhan tur a awm lo’ tih a sawi.
Chawlhkar hnih liam taah khan Trump-a hian President Vladimir Putin-a chu ni 50 chhunga indo titawp turin a ti a, a nih loh chuan tariff sang tak lakah a vau.
Scotland-a thuthar lakhawmtute a kawmnaah Trump-a chuan Thawhtanniah emaw, Thawhlehniah emaw tiam chin tawp hun puan chian a nih dawn thu a sawi a, tariff sang laksak tur erawh Moscow lakah ni lovin, an thawhpui ram lakah a ni dawn tih a sawi.
July thla tirah khan Russia-in a sumdawnpui ram atanga thil a lak luha chhiah a lakluh chu 100%-a tihsan a tum tih a losawi tawh.
Hei hi a taka kalpui a nih chuan heng ram atanga thil lak luh chu a man a to awn hle a, US hian ram dang tlawm zawk atanga lei tur dapin Russia leh an sumdawnpui ramten tam tak an hloh phah dawn.
Scotland-a UK Prime Minister Keir Starmer-a nen an inkawm zawhah Trump-a chuan Ukraine-a Putin-a chet dan chu a duh loh thu a sawi leh.
Putin-a’n ‘dawt a hrilh’ tih erawh a sawi lo va, Trump-a hian Russian president nen hmaichhana an inbiakna leh Ukraine-a zan tin deuhthaw missile a kap lut chu thil inmil lo a ni tih erawh a sawi.
“Inkahhai puan, muanna siam thlengin… chutih laiin Kyiv leh hmun hrang hrangah missile a thlawh luhtir si a ni,” tiin indawrna a awm chu a theih reng a; mahse, ‘thil kalpui nan a tlai tawh’ tih a sawi.
Inbiakna chu vawi tam a awm tawh a, a duh tawh lo tih a sawi a, Putin-a nen chuan thui tak an inkawm tawh thu a sawi a ni.
Putin-a hian hun tiam pek hi a sawi ri ngai lo va, ni 50 chhung hun pek a nih khan Kremlin thupuangtu, Dmitry Peskov-a chuan ‘an ngai thutak hle’ tih sawiin Moscow chuan zir chian nan hun a mamawh tih a sawi.
Thawhtanni chawhnu khan Russian MP Andrey Gurulyov-a chuan Trump-a vauna chuan ‘indonaah emaw, Moscow-ah emaw, hna athawk dawn lo’ tih erawh a sawi a, Russia chuan ‘ralthuam, tum leh hlen tur’ chakna a nei tih a sawi.
Trump-a’n hun tiam a pawh tawi hnuah hian Ukrainian presidential chief of staff Andriy Yermak chuan lawmawm a tih thu a sawi thung.
Tun hnaiah Russia hian Ukraine hi na taka bei tharin drone leh missile hmangin khawpuite a kap a, khawchhak lamah nipui kal mekah a nawr na hle bawk.
Turkey-in Russia leh Ukraine inbiakna vawi thum thleng tawhin mi an inmansak chhuah turin an inrem a, inkahhai lam erawh an thleng thei rih lo.
Kum thum leh a chanve an indo hnuah khawi lam ve ve pawh hian ni 12 chhungin eng angin nge inremna an siam theih ang tih a chiang rih lo.
Russia hian muanna atana a thil phut zingah Ukraine chu tan lam nei lo, a sipaite tihtlem leh Nato-a tel a tumna bânsan a tel a, heng hi Kyiv leh an thawhpui khawthlang ramten an duh loh a ni.
Kar hmasaa an inbiakna, darkar khat awrh awhah pawh Peskov-a chuan hlawhtling taka inbiakna chu a harsa tih a sawi.