Ukraine President Volodymyr Zelensky chuan Bakhmut chu tihchhiat vekin a awm tia sawiin mahse Russia-in khawpui a kutah a awm tawh a tih chu a hnawl thung.
A sipaite chuan Bakhmut chu an la thunun em tia zawhna chu Zelensky chuan, “A vanduaithlak, chhiatna a ni a, mahse vawiin hian Bakhmut kan rilruah a cham reng,” tiin a chhang a. A hnu lawkah a office chuan khawpui chu Russia kutah a awm a ti lo tiin an sawifiah zui.
Inrinni khan Wagner Russian paramilitary te chuan Bakhmut khawpui chu an lak tawh thu an sawi a. An founder Yevgeny Prigizhin chuan figher-te nena an thlalak tarchhuakin a sipaite chuan khawpui pum an thunun tawh tiin a sawi a, hei hi Ukraine sorkar chuan a hnawl nghal vat thung.
Pathianni vek khan president Vladimir Putin chuan Russia chuan Bakhmut inbeihnaah chakna a chang tia sawi sipai tin te chuan state award an dawng vek ang, a ti bawk a.
Analysts te chuan Bakhmut chuan Moscow tan strategic value a nei tlem an ti a, mahse, Ukraine indonaa inbeihna awhrei ber a nih avangin Moscow tan chuan hnehna chhinchhiahna pawimawh an ti thung.
Nikum August thla atang khan Bakhmut ah hian inbeihna kalpui a ni tawh a. Western officials te chuan Bakhmut beihna bikah hian Russia chuan sipai 20,000 atanga 30,000 a chan tawh an ti a, Ukraine pawhin a chan nasa takzet an ti bawk.
G7 meeting neihnaah Zelensky chuan, “Engmah a awm lo tih in hriatthiam a ngai a, engkim an tichhe vek a ni,” tiin a sawi a. “Russian tam tak an thi,” a ti bawk.
Russia-in Bakhmut la ti, Ukraine-in hnawl
Get real time updates directly on you device, subscribe now.
Prev Post