Hmeichhe dinhmun chawikan aupuiin thirsakawrin India tlawhchhuah tum

Hmeichhe dinhmun chawikan aupuiin
thirsakawrin India tlawhchhuah tum
Hmeichhe dinhmun chawikan aupuia thirsakawra India state 28 tlawhchhuah tum Aasha Malviya chuan May 19 khan Mizoram a lo lut a, state hotu thenkhat a kawm.
Madhya Prasesh Rajghar district Nataram khua ami Aasha Malviya hian 2022 November 1 khan a chenna khua chhuahsanin India state zawng zawng fanchhuah a tum a. State 18 a tlawh hnuiin kar kalta Zirtawpni chawhnu dar 3.30 khan Aizawl a thleng a, state 19 a tlawhna a ni. Tunah hian thirsakawrin km. 16200 a tlan tling tawh a, kumin August 15-a Delhi thleng lehin, India a fanchhuahna kawng hi a zawh tawp dawn a ni. A vaiin km. 25000 vel a tlan dawn a ni.
Amah hi national sportswoman leh mountaineer (Book of Record holder) a ni a. hmeichhe himna naihtuah leh an dinhmun chawikanna bakah remna leh muanna chu a thu aupui a ni.
Raj Bhavan-a larsap Dr Hari Babu Kambhampati a hmuhnaah India rama hmeichhiate dinhmun ngaihsak a, an dunhmun chawisan a nih theihna’na Aasha Malviya-in engkim mahni intum chawp a, hma a lakna chu fakawm a tih thu a lo hrilh a. He hmalakna hian India mipui zingah harhtharna a thlen ngei a beisei tih sawiin, India hmeichhiate zingah amah anga sulsutu an lo chhuah zel a beisei thu a sawi a ni.
Chief minister Zoramthanga a hmuhnaah a huaisenna chu fakawm a tih thu lo hrilhin, himna kawnga India rama hmeichhiate dinhmun chiang zawka mipuiin an hriat theihna’n leh khawtlanga hmeichhiate dinhmun chawikan mamawhnate zau zawka puanchhuahna tura Pan India Cycle Tour a neih chu, kawng engemaw zawng tala hmasawnna tha a thlen a beisei thu a lo hrilh a ni.
Inrinni khan Aasha Malviya hi Sports & Youth Services minister Robert Romawia Royte chuan tukthuan a buatsaih sak a. DGP Devesh Chandra Srivastva a hmu bawk.