Ukraine defence minister chuan Russia in nasa zawka chetlak a tum tia sawiin 24 February velah beihpui a thlak hman a rinthu a sawi.
-- Advertisement --
Oleksii Rexnikov chuan Moscow chuan sipai sang tel lakhawm tawhin nikuma Ukraine a do champha velah chiah nasa zawka chetlak a tum a ni a ti a.
February 23 chu Russia in Defender of the Fatherland Day an hman hun niin army te an fak hun pawimawha ni a ti bawk a. Reznikov chuan Moscow chuan sipai 500,000 chuang a la khawm tawh tiin a sawi bawk.
Nikum September thla khan Russian President Vladimir Putin chuan sipai tang turin mi 300,000 chuang a lakhawm tawh a, chu chu Russia ram himna atana pawimawh tiin a sawi a.
Mahse Reznikov chuan Ukraine bei tura Russia in sipai a chhawp chhuah te chu a aia tam fe an nih a rinthu a sawi a. “Official takin 300,000 an ti mai a, mahse, ramria an sipai te kan hmuh dan atang chuan chu aia tam fe chu an ni” tiin French BFM network hnenah a sawi.
Donbas region ah inbeihna nasa zawk a thleng tihmai lohah chuan tun hnai chhovah Ukraine in chhimlam khawpui Kherson a lak hnuah boruak tang em em a awm lo va. Mahse, tun hnai lawkah RUssia chuan Soledar khua chu Ukraine a chhuhsak veleh thung.
Mahse, thal thawt veleh Russia in nasa zawka beihpui a thlak leh Ukraine in theihpalingkawha inven a lo tum chu thil awm dan tura ngaihsa a ni a. US-based Institute for the Study of War (ISW) te chuan Moscow chuan lohtheihlohin Ukraine khawchhak lamah beihpui a thlak ang an ti bawk.
Reznikov chuan Ukraine commander te chuan frontline ngelnghet zawka siamin beilet tura an inpuahchah thu a sawi a. “Kum 2023 hi sipai lama chakna kan chan kum ni turah ka ngai” tia sawiin Reznikov chuan Ukraine sipai te chuan an hmasawn tawhna te an hloh a thiang lo a ti bawk.
Ukraine defence minister hian France tlawh mekin MG-200 air defence radars lei turin a kal a, he ralthuam hmang hian Ukraine chuan air target hrang hrang winged leh ballistic missiles leh drone chi hrang hrang te an hmu zung zung thei dawn a ni.
Hetihlai hian Ukrainian intelligence te chuan President Putin chuan Donbas region chu thal a zawh hma ngeiin thunun turin a ti tia sawi a ni a.
Nato Secretary-General Jens Stoltenberg thung chuan Putin hian Ukraine easter region ah chauh duhtawk a hmu dawnin a lang lo a ti thung a. “Ralthuam thar an neih belh zel a, ammunition thar te neiin an siambelh nasa bawk a. Authoritarian state dang Iran leh north Korea ang te atangin ralthuam an chawlut belh zel bawk” tiin Stoltenberg chuan a sawi a.
“A pawimawh lai ber zawk chu President Putin chuan he inrunnaa thleng mekah hian a tum thlak tumna engmah a nei lo. A thenawm Ukraine thunun chu a tum ber a la ni zel a. Chutiang a nih chhung chuan hun rei tak indo tura inpuahchah a ni mai” tiin a sawi.
Hetihlai hian Ukraine Deputy Defence Minister Hanna Malyar chuan Donbas region ah inbeihna nasa tak a thlen mek thu sawiin Russian forces leh Wagner Group te chuan Bakhmut khua lak tumin an bei mek tiin a sawi a.
Moscow sipai te chuan nikum October thlaa Ukraine in a thunun tak Russian logistic hub Lyman khua pawh lak tumin beihpui an thlak mek a ti bawk.